Бейсенбі күнгі есептік кездесу Үлкен Сұлутөр ауылдық №39 орта мектеп ғимаратында өтті. Ауыл ақсақалдары мен тұрғындардың басын қосқан бұл жиында бірқатар күрмеуі қиын мәселелер көтеріліп, жағымды жаңалықтар да айтылды.
Шынтуайтында, жер-жерлерде ұйымдастырылып, билік пен бұқараның арасындағы «алтын көпірге» айналған есеп беру кездесулерінің халыққа берері мол. Мұндай жиын барысында әкім халық алдында ала жаздай атқарған жұмысын ағынан ақтарса, тұрғындар өз алдында мұң-мұқтажын ортаға салып, көкейдегісін жайып салатыны тағы бар. Дейтұрғанмен, жыл өте ауылдағы ағайынның жағдайы жақсарып, жанайқайға ұласқан «анау жоқ, мынау жоқтың» заманы алыстап бара жатқан сыңайлы.
Былтыр Үлкен Сұлутөрде де ауқымды тірліктер атқарылды. Бұған әкімнің есеп беру баяндамасына қатысқан қонақтардың көзі жетіп, атқарылған тірлік нақты сандармен тарқатылды. Мәселен, бюджеттік шығындар көше жарықтандыруға, абаттандыру және көгалдандыруға, шағын-футбол алаңына жарықтандыру орнатуға, жолдарды күтіп ұстауға, Абылайхан көшесіне орташа жөндеу жұмыстарын жүргізуге жұмсалған екен. Осыдан кейін аудан әкімі Бегзат Болатбеков биылғы жылғы жоспарларды тізіп өтті. Оның қатарында Үлкен Сұлутөр ауылында «стритворкаут» алаңын орнату, биотермиялық шұңқыр құрылысы, спорт кешенінің құрылысы, 90 орындық мәдениет үйінің құрылысы сынды жұмыстар бар.
Жалпы, таулы аймақтағы қос сұлутөрдің ортақ проблемасы ауыз су. Бұл мәселе көптен бері шешімін таппай келеді. Десе де оны шешу үшін жұмыстар жасалып-ақ жүр. Басты проблема – жер асты су қорының жетіспеуі екені анық. Бұлақ-жылғалардан жиналатын су жаздың аптап ыстығында тартылып қалса, қыста қатады. Суды жинайтын тоспаның жағдайы да мәз емес. Бүгінгі күнге Үлкен-Сұлутөр ауылының ауыз су құбырын жаңарту үшін жобалық-сметалық құжаттамасын әзірленіп, бюджеттік өтінім тапсырылған. Қаржыландыру мәселесі шешілсе, бұл маңызды жұмыс басталатын болады. Сонымен қатар, ауылдағы 4 көшеге асфальт төсеу мәселесі де күн тәртібінде. Алайда, бұл жұмыс ауыз су құбырын жаңартуға қарап тұрғаны белгілі. Тұрғындар көтерген тағы бір мәселе – мектепке күрделі жөндеу жұмысы қажет. Себебі, 1986 жылы соғылған 724 орындық білім ошағының ғимаратының төбесінен кей жерлерінен су өтіп тұр, мектепке келетін жылыту құбырлары, жылыту жүйесі мен ауыз су жүйесі ескірген.
Бегзат Сейсенқұлұлы осы мәселелер және тұрғындардың өзге де сұрақтары бойынша өз жауабын беріп, мектеп акт залына жиналған тұрғындармен сұхбат құрды. Әкім әр мәселе бойынша жұмыстар атқарылатынын және де бақылауда болатынын атап өтті.
