Халықпен кері байланыс орнату және мәселелерді тұрғындармен бірге талқыға салу мақсатында аудан, ауылдық округ әкімдерінің жыл қорытындысына арналған жиындары жалғасуда.
Бейсенбі күні белгіленген кесте бойынша аудан басшысы Бегзат Болатбеков Отар ауылдық окургі тұрғындарымен есепті кездесу өткізді. Округ құрамына Отар, Гвардейский ауылдары және Аңырақай, Бел темір жол айрықтары кіреді. Жиын барысында округтегі былтыр атқарылған оңды шараларды атап өткен округ әкімі Дидар Есімов ауылдықтардың әл-ауқатын жақсарту мақсатында істелінген жұмыстармен таныстырды. Жиын барысында тұрғындар тарапынан бірқатар мәселелер көтерілді. Аудан әкімі өз кезегінде тұрғындардың ой-пікірін соңына дейін тыңдап, түйткілді мәселенің түйінін тарқатуға тырысты. Сәйкесінше айтылған мәселелер алдағы уақытта қаралып, жұмыс жоспарына енгізетінін айтты.
«Бүгінгі таңда бірнеше мәселе қолға алынып жатыр. Биыл Отар ауылында Қонаев көшесімен Жікенов көшесінің бұрылысына дейін көше жарығын орнату жұмыстары жүргізіледі. Сондай-ақ жолға келетін болсақ, ол мәселе бойынша Отар ауылында Атамқұлов, Самал көшесінен Төлесбай көшесіне дейінгі жол, Кебекбай шешен, Ноғайбай би көшелеріне орташа жөндеу жасалады. Балалар ойын алаңшасын сұраған болатынсыздар. Сол өтініштеріңіз биыл шешімін табады. Отар және Аңырақай ауылдарына балалар ойын алаңшасын орнатылатын болады. Сонымен қатар, Гвардейский қалашығында қызмет көрсету желілерін жүргізе отырып су құбыры желілерін қайта жаңарту жоспарда тұр», — деді аудан басшысы.
Президент Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында айтылған «Тыңдайтын мемлекет» қағидасы биылғы есептік кездесуде көрініс тапты. Бұлай деуімізге әкімдердің халық алдында емін-еркін тіл табысып, кез келген сұраққа тұщымды жауап беруі әрі елмен бірге залға жайғасуы себеп. Бұл шынында да бұқара мен биліктің арасы біртабан жақындай түскенін көрсетіп тұрғандай.
