29 наурызда Қордай аудандық Мәдениет үйінде әнші, облыстық, республикалық байқаулардың лауреаты Сауле Жуатбекованың өнер жолындағы он бес жылдық белесіне арналған «Ән қанатында» атты шығармашылық ән кеші өтті.
Жуатбекова Сәуле Төленбайқызы — Қордай ауданы әкімдігінің мәдениет және тілдерді дамыту бөлімінің «Аудандық мәдениет үйі және тарихи-өлкетану музейіне» қарасты Қордай аудандық Мәдениет үйінің кәсіби білімі бар талантты әншісі. Ол Қордай ауданы, Бетқайнар ауылында дүниеге келген. Еңбек жолдары өнер ұжымдарында, білім беру мекемелерінен бастау алған.
Әнші түрлі өнер жобаларының жеңімпазы. Алғыс хаттар мен дипломдардың иегері, аудандық, облыстық, республикалық конкурстардың лауреаты. Өнер фестивальдерінде, облыстық мәдени іс-шараларда, білім саласында ел ықыласына бөленіп келеді.
Репертуарында қазақ және өзге тілде әндерді орындап, өз тыңдарманын тамсандырып қалыптастырды. Балдәурен кезінен әнге құмар болып өскен талантты әнші, бүгін де өз мақсатына жетіп, халықтың әдемі әншісіне айналды. Отбасында аяулы ана, қымбатты құрбы, өнер ұжымында білікті әнші.
Кеш қонақтары К.Әзірбаев атындағы Жамбыл облыстық филармониясының Қазақ халық аспаптар оркестрі, дирижері әрі көркемдік жетекшісі Дулат Байзілдаев, Халықаралық, Республикалық байқаулардың лауреаты, Өнертану ғылымдарының магистрі, Темірбек Жүргенов атындағы «Музыкалық өнер» факультетінің «Эстрадалық вокал» кафедрасының аға оқытушысы Меруерт Мүсірәлі, Қордай ауданының «Құрметті азаматы», Мәдениет саласының үздігі айтыскер-ақын Күміскүл Сәрсенбаева, Мәдениет саласының үздігі, дәстүрлі әнші «Алтын адам» сыйлығының иегері Қарлығаш Қожағазина, «Ойжайлау» фольклорлық ансамблінің жетекшісі, дәстүрлі әнші Ұлдан Шалабаева, Мәдениет саласының үздігі, әнші-композитор Жандос Омаров және Ерхат Тәжібаев, Ұлан Әшімов, Асылжан Тауыржан, «Махаббат» би ансамблі болды.
Концертте әнші Кенен Әзербаевтің «Бастау», халық әнідері «Алқоңыр», «Гаухар тас», Нұрғиса Тілендиевтің «Куә бол», Шәмші Қалдаяқовтың «Арыс жағасында», Исаак Дунаевскийдің «Заздравная», Александр Зацепиннің «Мама», Луйджи Ардиттидің әндерін оркестрдің сүйемеледуінде орындаса,
Меруерт Мүсірәлінің «Бақыт екен бар болғаны», Самат Рыспанбетовтің «Биле-биле», Жандос Омаровтың «Ойладым сені», Айгүл Мақашованың «Бақыт тіледім» әндерін эстрада жанрында шырқады. Ал оркестр Түркештің «Көңілашар», Әбдімомын Желдібаевтың «Ерке сылқым» күйлерін тарту етсе, «Махаббат» би ансамблі би билеп, ән кешіне көрік қосты.
Концертте әнші Алғыс хаттармен марапатталды.
