Мемлекет басшысы Қасым-Жомарт Тоқаев өз сөздерінде балалардың құқықтары мен мүдделерін қорғау мемлекеттік саясаттың басты бағыты болуы тиіс екенін бірнеше рет атап өткен. Президент кәмелетке толмағандардың қауіпсіздігіне ерекше назар аудару қажет екенін және балаларға қатысты зорлық-зомбылық істерінің әрқайсысын мұқият бақылауда ұстау керектігін айтқан. Оның айтуынша, елдің болашағы өсіп келе жатқан ұрпақтың құқықтары қаншалықты сенімді қорғалғанына тікелей байланысты.
Осыған орай, Қордай ауданында жасөспірімдер арасындағы құқықбұзушылықтың алдын алу бағытында маңызды жұмыс жалғасуда. Ауылдық округтерде өткізіліп жатқан кездесулер жай ғана әңгіме емес, бұл – ұрпақтар диалогы. Балалардың болашағы, отбасының құндылығы және заңмен өмір сүрудің маңыздылығы туралы ашық әңгіме өрбиді.
Алғашқы кездесулердің бірі Аухатты ауылдық округінде өтті. Мұнда оқушылар ауыл басшыларымен, ақсақалдармен және құқық қорғау органдарының өкілдерімен ашық сөйлесуге мүмкіндік алды. Себебі кәмелетке толмағандар арасындағы құқықбұзушылықтың алдын алу – бұл жай ғана статистика емес, әрбір баланың қауіпсіздігі мен болашағына деген қамқорлық.
Бұл жұмыс кәмелетке толмағандардың қараусыз қалуының алдын алу, олардың құқықтары мен заңды мүдделерін қорғау мақсатында құрылған мобильді топтың аясында жүргізілуде.
Бүгін Аухатты мен Қызылсай ауылдарының мектептерінде әрбір жасөспірім естуге тиіс маңызды сөздер айтылды: заң – жау емес, тірек. Спикерлер – округ әкімі Алмас Иенберген, ақсақалдар кеңесінің төрағасы және учаскелік инспектор – құқықбұзушылықтың салдары, заң бұзғаны үшін жауапкершілік және өз құқықтарын дұрыс пайдалана білудің маңыздылығы туралы сөз қозғады.
Шарадан Степное округі де шет қалмады. Мұнда мобильді топ ашық пікірталас және бейнероликтер көрсету форматында кездесу өткізді. Ерте жүктіліктің алдын алу, суицидтің алдын алу, құқықтық мәдениетті нығайту сияқты маңызды тақырыптар қозғалды.
Оқушылар мұқият тыңдап, сұрақтар қойды. Көпшілігі үшін бұл — таңдаудың әрдайым өз қолында екенін және сол таңдау болашақты айқындайтынын түсінетін сәт болды.
Ата-аналар мен ұстаздардың рөліне ерекше мән берілді. Өйткені дәл солар жасөспірім бойында ең алдымен жауапкершілік, тәртіп пен заңға деген құрмет сезімін қалыптастырады.
Бұл кездесулер – бір реттік іс-шара емес, жүйелі жұмыстың бір бөлігі. Мобильді топ өз жұмысын жалғастыра береді, яғни аудан ауылдарында заңмен өмір сүру – абыройлы өмір сүру екенін білетін ұрпақ өсіп келеді.
