Қордай аудандық орталық ауруханасының акушер-гинеколог дәрігері Күлпан Тажиева жақында Түркия Республикасындағы Коджаэли медицина университетінің университеттік клиникасында өткен халықаралық тәжірибе алмасу бағдарламасы аясында оқудан өтті.
2025 жылғы 6-17 қазан аралығында Қазақстаннан келген төрт акушер-гинеколог Түркияның Коджаэли медицина университетінің университеттік клиникасында оқыды. Тағылымдаманың мақсаты біліктілікті арттыру, жүкті әйелдер мен босанған әйелдерді диагностикалау мен емдеудегі шетелдік тәжірибемен танысу, сондай-ақ перинаталдық күтімді ұйымдастыруды зерделеу болды.
1994 жылы құрылған клиника – заманауи жабдықтары бар ірі оқу және емдеу мекемесі. Акушерлік және гинекология бөлімі «Балаға мейірімді аурухана» мәртебесіне ие және жылына 900-ге жуық әйелді босандырады. Түркияда акушер-гинекологтарды даярлау 11 жылға созылады (6 жылдық базалық білім және 5 жылдық резидентура).
Бағдарламаның басты мақсаты — ана мен бала денсаулығын қорғау саласындағы мамандардың кәсіби біліктілігін арттыру және халықаралық тәжірибені меңгеру. Мұндай тәжірибе алу арқылы дәрігерлер заманауи медицинаның барлық аспектілерімен танысып, өз білімдерін жетілдіруге мүмкіндік алады.
Оқыту бағдарламасы қарқынды терапия хаттамалары, жабдықты пайдалану (ӨЖЖ, УДЗ, мониторинг), перинаталдық күтімді ұйымдастыру және күрделі клиникалық жағдайларға пәнаралық тәсіл бойынша теориялық және практикалық сабақтарды қамтыды. Практикалық бөлімге клиникалық тексерулер, кесарь тілігі операцияларын бақылау, процедуралар және түрік әріптестерімен клиникалық жағдайларды талқылау кірді.
«Түркия еліндегі оқу акушерлік және гинекологиядағы қарқынды терапияның заманауи әдістерімен танысуға мүмкіндік алдым. Түрік тәжірибесінде кесарь тілігінің жоғары жиілігі назар аударды. Қазақстандық денсаулық сақтау саласына үздік тәжірибелерді бейімдеу және енгізу үшін алынған тәжірибені одан әрі талдау қажет деп ойлаймын. Сондай-ақ, ең жақсы тәжірибелерді қабылдау үшін неонаталдық өлім-жітім деңгейі төмен елдерде тағылымдамадан өтуді ұйымдастыру қажет деп санаймын. Жүктілік пен босануды жүргізудің шетелдік модельдерінің тиімді элементтерін енгізу, оларды ұлттық жағдайларға бейімдеу», — дейді Күлпан Тажиева.
Күлпан Түрікбайқызы оқу барысында акушерлік және гинекологиялық реанимация, жаңа туған нәрестелердің интенсивті терапиясы, сепсис пен преэклампсия сияқты күрделі жағдайларды емдеу тақырыптарында дәрістер тыңдады және тәжірибелік сабақтарға қатысты. Операциялық блок пен интенсивті терапия бөлімдерінде болғанында, ол заманауи медициналық жабдықтармен танысып, Түркияның жетекші клиникаларында қолданылатын емдеу хаттамаларын зерттеді.
Енді К.Тажиева алған білімін Қордай аудандық орталық ауруханасының тәжірибесіне енгізуді жоспарлап отыр. Ол әйелдер мен нәрестелерге көрсетілетін медициналық көмектің сапасын одан әрі арттыруға ниетті. «Алған тәжірибем мен білімім біздің ауруханамызда медициналық қызмет көрсету сапасын жақсартуға көмектесетініне сенімдімін», — дейді ол.
Қордай аудандық орталық ауруханасының ұжымы Қазақстан Республикасының Денсаулық сақтау министрлігіне және Стамбул қаласындағы Қазақстан Республикасының Бас консулдығына көрсеткен қолдауы мен кәсіби даму мүмкіндігі үшін шынайы ризашылығын білдіреді. Олар бұл бағдарламаның дәрігерлердің кәсіби шеберліктерін дамыту үшін ерекше маңызы бар екеніне сенімді.
Күлпан Түрікбайқызы сияқты мамандардың ұмтылысы мен жаңа білімді игеруі — біздің медициналық қызметіміздің сапасын жақсартудың кепілі.
Мадина УЗБЕКОВА
