Жамбыл облысы Бектөбе алқабында орналасқан Амангелді Иманов атындағы орта мектеп қабырғасында ерекше рухани кездесу өтті. Бұл жиын – туған жерге оралып, өткенін еске алып, жас ұрпақпен ой бөліскен танымал жазушы, журналист әрі қоғам қайраткері Қуат Борашпен болған тағылымды сұхбат алаңы болды, деп хабарлайды baq-orda.kz.
Кездесу әсерлі әрі шынайы атмосферада өтті. Қонақты мектеп ұжымы, сыныптастары мен достары жылы қарсы алып, оқушылар оның өмір жолына қызығушылық танытты. Жазушы өз кезегінде балалық шағын еске алып, арман-мұраттары мен өмірлік таңдауы жайлы ой бөлісті. Әсіресе оқушылар қойған «Бала кездегі арманыңыз орындалды ма?» деген сауал көпшілікті терең ойға жетелеген ерекше сәт болды.
Кездесу аясында Қуат Бораш өзінің «Тәубе» атты жаңа романын таныстырды. Бұл шығарма қазіргі қазақ қоғамындағы рухани ізденіс, дін мен дәстүр сабақтастығы, адам болмысы секілді күрделі мәселелерді қамтитын әлеуметтік-психологиялық туынды ретінде бағалануда. Романда үш буын өкілдерінің тағдыры арқылы ұлттық құндылықтар мен сенім жолындағы күрес көркем бейнеленген.
Шараға өңірдің белгілі қаламгерлері мен қоғам өкілдері қатысып, шығарманың мазмұны мен маңыздылығына жоғары баға берді. Олар бұл туындының әсіресе жастар үшін маңызды екенін, себебі онда өмірлік бағыт пен рухани ізденіске қатысты өзекті мәселелер қозғалғанын атап өтті.
Бұл кездесу – өткен мен бүгіннің арасын жалғаған, жас буынға бағыт-бағдар берген рухани көпір іспетті. Осындай тағылымды басқосулар арқылы өскелең ұрпақ өз тамырын танып, ұлттық құндылықтарға деген құрметін арттыра түседі.
