Жақында Қордай ауданында білім мен ойдың, дәлел мен дәйектің нағыз додасына айналған ерекше рухани шара өтті. Аудандық мектеп оқушылары арасында ұйымдастырылған дебат турнирі жас буынның сыни ойлау қабілетін шыңдап, пікір айту мәдениетін жаңа деңгейге көтерді.
Бұл зияткерлік сайысқа ауданның әр мектебінен және қосымша білім беру ұйымдарынан жалпы саны 29 команда қатысып, өзара бақ сынасты. Жас пікірсайысшылар қоғамдағы өзекті мәселелерді талқылап, өз көзқарастарын дәлелдер арқылы қорғап, қарсы пікірлерге сауатты жауап беруге тырысты. Турнир барысында оқушылардың логикалық ойлау деңгейі, шешендік қабілеті мен сахна мәдениеті анық байқалды.
Сайыс ережесіне сәйкес командалар екі лигаға бөлініп өнер көрсетті. «Альфа» лигасында 9–11 сынып оқушылары өзара мықтыны анықтаса, «Бета» лигасында 6–8 сыныптың жас таланттары білім мен тапқырлықта бақ сынады. Әр лигадағы ойындар жоғары деңгейде өтіп, қатысушылардың дайындықтары мен жауапкершіліктері айқын сезілді.
Турнирдің басты ерекшелігі – оның тек жарыс емес, оқушылар үшін үлкен тәжірибе алаңына айналуында. Қатысушылар тек жеңіс үшін емес, өз ойларын еркін жеткізу, қарсы пікірді құрметтеу және дәлелді диалог құру мәдениетін қалыптастыру мақсатында сынға түсті.
Аталған ауқымды шараны «Қордай ауданының ұлттық-мәдени орталықтарының қауымдастығы» заңды тұлғалар бірлестігі ұйымдастырды. Сонымен қатар турнирді ұйымдастыруға атсалысқан Қордай ауылдық мәдениет үйіне бірлестіктің алғысы шексіз.
Жалпы, дебат турнирі – білімді ұрпақ тәрбиелеудің тиімді құралдарының бірі екенін тағы бір мәрте дәлелдеді. Осындай мазмұнды іс-шаралар жас буынның ой-өрісін кеңейтіп, ел болашағына бей-жай қарамайтын саналы азаматтарды қалыптастыруға жол ашады.
