Бүгін Бетқайнар ауылындағы мәдениет үйінде қоғамдық қабылдау өткізілді. Бұл шара Қордай аудандық прокуратурасының бастамасымен, аудан әкімінің орынбасары Бақыт Сахатов және аудандық мемлекеттік мекемелердің қатысуымен ұйымдастырылды. Шара «Қоғаммен байланыс» жобасы аясында өтті.
Қабылдауға аудан прокуроры Қайыржан Қуатбеков, аудандық құқық қорғау саласының өкілдері, бөлім мен мекеме басшылары қатысты. Әрбір тұрғын жеке қабылданып, оларды мазалаған сұрақтар мен мәселелері тыңдалды.
Тұрғындар әртүрлі мәселелермен жүгінді. Бірқатары құқық қорғау органдарына қатысты сұрақтар қойды. Мәселен, жергілікті тұрғындардың құқықтарын қорғау мәселелері, әкімшілік құқықбұзушылықтар және олардың алдын алу, сондай-ақ азаматтардың қауіпсіздігіне қатысты сұрақтар қозғалды.
Шараның мақсаты көп қырлы болды. Біріншіден, тұрғындардың талап-тілегіне құлақ асу, олардың пікірлерін тыңдау, әрі халықты толғандыратын мәселелерді жергілікті жерде шешу. Екіншіден, қабылдау барысында тұрғындар мен мемлекеттік органдар арасындағы диалог орнату, құқық қорғау және әкімшілік саладағы мәселелер бойынша ақпараттық қолдау көрсету.
Көптеген қабылдауға келген тұрғындардың шағымдары құқықтық сипатта болды. Олар арасында әсіресе жер дауы, тұрғын үй мәселелері, жұмыссыздық, әлеуметтік көмек алу жолдары мен әкімшілік құқықбұзушылықтар жайлы сұрақтар ерекше назарға алынды. Мәселен, кейбір тұрғындар жергілікті биліктің көмегіне жүгініп, тұрғын үй алу, әлеуметтік көмек мәселелерін шешу үшін қандай процедураларды орындау қажеттігін білгісі келген.
Аудан әкімінің орынбасары Бақыт Оңласынұлы қабылдау барысында тұрғындарға мәселелерінің шешімін табуға көмектесетін заңдық және практикалық тұрғыдан кеңестер беріп өтті.
Тұрғындардың қоғамдық қабылдауға белсенді қатысуы назар аударарлық. Олар өздерінің жеке шағымдары мен мәселелерін ашық айтып, кейбірі нақты ұсыныстарымен бөлісіп отырды. Аудандық құқық қорғау саласының өкілдері азаматтардың құқықтарын қорғау, заңбұзушылықтарды болдырмау бойынша жұмыстар туралы ақпарат берді.
Ауыл тұрғындарының белсенділігі мен ұсыныстары мемлекеттік органдарға қоғамның талабын айқын көрсетеді. Сондықтан мұндай шараларды тұрақты түрде өткізіп, тұрғындардың қажеттіліктерін түсініп, олармен жұмыс жасай беру маңызды болып табылады. Қоғамдық қабылдау – жергілікті тұрғындар үшін әлеуметтік, құқықтық, және тұрмыстық проблемаларын шешуге арналған маңызды алаң ретінде қызмет атқарады.
Бетқайнар ауылында өткен қоғамдық қабылдау шарасы – тұрғындар мен мемлекеттік органдар арасындағы байланысты нығайту, туындаған мәселелерді шешуге көмектесу, сондай-ақ, тұрғындардың құқықтық сауаттылығын арттыруға бағытталған маңызды шара.
Әділет ҚҰТТЫБАЙ
