2019 жылдың соңына қарай Қытайда белгісіз ауру тарап жатқаны, әзірге ешқандай сипаты не болмаса емдеу жолы жоқ екені турасында әлемдік хабар тарататын арналар мен интернет желісінде ақпарат тарай бастады. Ухань деген қаладан шыққан белгісіз вирус бізге жаңалықтардағы күнделікті көрсетіп жататын, көп ұзамай ұмыт болатын жағдай сияқты болып көрінгені рас. Жұрт жұмыла 2020 жылды қарсы алып, әлемдік державалар арасындағы қарым-қатынас, соғыс аймақтарындағы қақтығыстар, ұшақ апаттары, өзге де түрлі мәселелерді сөз қылып жатқанда жымысқы ауру Еуропаға дендеп кіріп, Азия мен Америкаға мысқылдап барды. Халықаралық әйелдер күнін атап өтіп, енді міне Наурыз мерекесіне дайындықты бастап жіберген елімізде вирус жұқтырған алғашқы адам тіркеліп, Мемлекет басшысы Қасым-Жомарт Тоқаев елге үндеу жариялаған болатын. Содан бері бір жыл уақыт өте шығыпты. Вируспен күреске арналған бір жыл…
