Әйел отбасының берекесін келтіріп тұратын адам, ол – шаңырақтың ұйытқысы, тыныштықтың шырақшысы. Мұндай алып күштің негізгі құпиясы – әйел-ананың шексіз махаббаты мен жылуында.
Наталья Владимировна Вешнекова Батыс Сібір тау бөктерінде дүниеге келген, балалық және жастық шағы Омбы өзенінің жағалауында өтті. Алайда, тағдыр оның өмірін басқа арнаға бұрып, бүкіл саналы ғұмырын Шу өзенінің солтүстік жағасында өткізуді бұйырыпты. Әйел-ананың маңдайына жазылғаны туған ауылынан мыңдаған шақырым қашықтан өз бақытын табу екен. Мұның да басты себебі – махаббат.
Өмірлік жары мен кәсіп таңдауда адам қателеспеуі тиіс дейді халықта. Наталья Владимировнаның жолы болды. Алыстағы Қордай ауданы жайлы достарынан естігені бар, тамаша табиғаты жайлы айтып, қонаққа шақырған. Содан, еңбек демалысына шығып, билет сатып алады да, жол тартады. Ары қарай бәрі де жылдам болды. Шағын Мұзбел ауылындағы жергілікті ауруханадан жұмыс ұсынды. Ол келісім берді. Осылайша, өмірінің жаңа белесі басталды.
Кенен ауылының тумасы Абыхан есімді жігітпен танысып, өмірге деген көзқарасы мүлдем өзгерді. Жас келін болып босаға аттаған ол бүгінде сүйікті әже болып отыр.
Балалары – оның қуанышы, немерелері – өмірінің мәні. Тек жанына бататыны осыдан үш жыл бұрын күйеуі қайтыс болып кетті. Ұрпақтарының мейірімі мен сүйікті жұмысы оның қайғысын азайтқандай. Ауылдастары еңбекқорлығы мен ашық мінезі үшін құрметтейді.
Шағын ауылдағы өмір бір қалыпты өтіп жатыр. Мұзбелдің атағы жайлы тек ауыл қарияларының жадында қалған. Бірақ ешнәрсе де бір орында тұрмайды. Мұндағы жаңа медпункт 2019 жылы пайдалануға берілді. Жұмыс орнында әйел бәрін бақылауда ұстауға тырысады. Фельдшер Вешнекова өзінің кәсіби міндетін адал атқаруда. Наталья Владимировна өз ауылдастарының сырқаты туралы бәрін біледі. Ол өз күшімен күресуге тырысады және төтенше жағдайда ғана аудан орталығындағы әріптестерінен көмек сұрайды.
-Бұл жерде ауырсынуды емдеу ғана емес, оның себебін түсіну маңызды. Кейде адамға қарапайым көңіл жетіспеуі мүмкін. Мұндай жағдайда дәрі-дәрмек көмектеспейді. Әрбір науқасқа жеке қарау керек, — деп сенеді ол.
Қазір Наталья Владимировна 104 адамның денсаулығына жауапты, науқастардың арасында бір жасқа дейінгі 2 бала және бір жүкті әйел бар. Ол оларға мүмкіндігінше көп көңіл бөлуге тырысады. Тұрақты жұмыс кестесі жоқ. Ауылдастары оның есігін күндіз де, түнде де қаға алады. Шалғайдағы ауылда фельдшерді профессор, медицина ғылымдарының докторымен салыстыруға болады. Н.Вешнекованың еңбегін тек мұзбелдіктер ғана емес, аудандық орталық аурухана басшылығы да жоғары бағалайды. 2014 жылы ол жоғары дәрежелі марапат алу үшін Астанаға барды. Көптеген жылдар бұрын Наталья Владимировна қиын таңдау жасалғанын, қиындықтар болатынын түсінді, бірақ ол күйеуінің сүйіспеншілігі мен сезімтал көзқарасы оған бәрін жеңуге көмектесетініне сенді. Бақытына орай, ол бір кездері Новосибирскіден Қордайға қоныс аударғанына ешқашан өкінген емес. Міне, биыл оның шалғай елді мекендегі медициналық пунктте табан ауыстырмай қызмет етіп жатқанына 35 жыл.
Ерлі-зайыптылар балаларына жақсы тәрбие беруге тырысты, жылулық пен сүйіспеншілік сыйлады. Салт-дәстүрді қастерлеуге, аға ұрпаққа құрметпен қарауды үйретті.
Бір кездері Абыхан мен Наталья құрған отбасы бүгінде бүтін әулетке айналды. Сыйластық пен сүйіспеншіліктің үлгісі деп осындай отбасыларды айтуға болады.
Шолпан САБАНОВА
