Сейсенбі күні аудандық мәдениет үйінің ұйымдастыруымен, Жамбыл облысының 85 жылдығы мен Ноғайбай бидің 190, Балуан Шолақтың 160 жылдығына орай аудандық жігіт сұлтаны байқауы өткізілді.
«Мен Алаштың ұланымын!» тақырыбында өткізілген шараға аудандық мәслихат депутаты Эльдар Апаев, аудандық мәдениет үйі директорының орынбасары Елдар Боранбек, мәдениет және тілдерді дамыту бөлімінің бас маманы Гүлдана Сатқали, мәдениет үйінің әншісі Ұлан Әшімов, мәдениет үйінің «Ой, жайлау» фольклорлық ансамблінің жетекшісі Ұлдан Шалабаева, «Махаббат» халықтық би ансамблінің режиссері Махаббат Бәденова әділ қазылық жасады. Білімді, әрі өнерлі жігіттердің басын қосатын байқау аудан төрінде дәстүрлі түрде ұйымдастырылып келеді. Онымен қоса, қатысушылар саны да жыл санап артуда. Жігіттерді батырлыққа, шешендікке, тапқырлыққа, тәрбиелеу мақсатында ұйымдастырылған шарада қатысушылар одан әрі «Тегімді менің сұрасаң», «Жігітке жеті өнерде аздық етер», «Күш атасын танымас», Шебердің қолы ортақ», «Ұлыларымызды ұлықтайық» сынды бөлімдер бойынша бақтарын сынады. Байқаудың мақсаты – ұлттық құндылықтарды дәріптей отырып, қазақтың төл мәдениетімен асқақ рухын, салт-дәстүрі мен жастар бойындағы тың идеяларды насихаттау, жоспарлы «Ұлттық мұра» бағдарламасы қағидаттары негізінде халқымыздың ізгі қасиеттерімен тәрбиелеу болып табылады. Шараның барлық кезеңі аяқталып, марапаттау рәсіміне де кезек келді. Серілер сынында білекті де жүректі жігітттер іріктеліп, мықтылыған көрсете білді. Нәтижесі бойынша бас жүлдені Қасық ауылының қатысушысы Арман Маметов иеленсе, жүлделі бірінші орын Бетқайнар колледжінің білімгері Ержан Динраушановқа бұйырды. Ал, Отарлық Ербатыр Серік пен Ноғайбайлық Нұрбек Тұрғынбек екінші орынды өзара бөлісті. Еңбек ауылынан бағын сынап келген Нұрсұлтан Аман, Қайнарлық Рымғали Нұрғали және Жамбылдық Ержан Қадамбай жүлделі үшінші орынды қанжығаларына байлады. Өзге қатысушылар да марапаттан құр қалған жоқ. Сонымен қатар, Бетқайнарлық Серікхан Ихласов «Парасатты жігіт» номинациясы, Цемзауыт ықшам ауданының қатысушысы Тимур Тоқтағұлов «Дарынды жігіт» номинациясы, Қарасулық Ералы Амангелді «Өнерлі жігіт» номинациясы, Қордай ауданының қатысушысы Ақылбек Мұхаммедияр «Көрермен көзайымы» номинациясы, Ноғайбайлық Нұрлығат Алиахмет «Шымыр жігіт» номинациясы, Сұлутөрлік Ақын Асылқұл «Жігерлі жігіт» номинациясымен ынталандырылды. Барша жеңімпаз, жүлдегерлерді құттықтаймыз!
Әділет ҚҰТТЫБАЙ
