15 қаңтар күні Қордай аудандық Мәдениет үйіндегі «Coworking» орталығында «Жастар ресурстық орталығы» КММ-нің ұйымдастыруымен «Спорт – өмір көркі» атты жас спортшылармен кездесу өтті. Бұл шараға Сарыбұлақ ауылдық округінің тумалары, спорт шеберлері Кеңес Марат пен Жандарбек Жиенбаев қатысып, №4 Балжан Бөлтірікова атындағы мектеп-лицейінің оқушыларымен жүздесті.
Айта кетейік, Кеңес Марат – самбо күресінен жастар арасындағы Азия чемпионатының қола жүлдегері, дзюдо күресінен Қазақстан Республикасының чемпионы, самбо және қазақ күресінен Қазақстан Республикасының спорт шебері. Жандарбек Жиенбаев – Қордай ауданының бірнеше дүркін чемпионы, облыс чемпионатының күміс және қола жүлдегері, «Қазақстан барысы» турнирінің 2021 және 2023 жылдардағы қола жүлдегері.
Ашық диалог форматында өткен кездесуде оқушылар спортшыларға өздерін қызықтырған сұрақтарын қойып, еркін сұхбаттасты. Спортшылар өз жолдарын қалай бастағандары, қандай қиындықтар мен қызықтарды бастан өткергендері туралы әңгімеледі. Сонымен қатар, оларды жаттықтырған бапкерлері, оның ішінде қазақ күресінің Қордай ауданындағы негізін қалаушы, спорт ардагері Алтыбай Мықтыбек туралы ерекше айтып өтті.
Бұл кездесу қазақ күресі мен ұлттық спортты насихаттауға, сондай-ақ жастарға мотивация беруге бағытталған. Әлемдік деңгейдегі чемпиондар өз жетістіктері мен тәжірибелері арқылы оқушыларға еңбекқорлықтың, табандылықтың маңыздылығын ұғындырды. Спортшылардың жетістігі жастарды спортпен шұғылдануға ынталандырып, салауатты өмір салтын ұстануға жігерлендіреді.
