Мемлекет басшысының әкімдердің халықпен кездесулерін өткізу туралы Жарлығына сай, бүгінде түрлі деңгейдегі әкімдер тұрғындардың әрбір уәжіне құлақ түріп, жергілікті жердегі мәселеге тереңнен үңілуге кірісіп кетті.
Қордай ауданының әкімі Бегзат Болатбеков Кенен ауылдық округі тұрғындарымен кездесіп, жұртшылықты мазалаған сұрақтарға жауап беруге тырысты. Алдымен округ әкімі Арман Жылыбаев өткен жылдың қорытындысы бойынша елдімекеннің негізгі әлеуметтік-экономикалық көрсеткіштері туралы баяндамасын таныстырды. Ауыл әкімінің айтуынша, күн тәртібіндегі өзекті мәселердің бірі ауыз су мәселесі екен. Бүгінгі күні ауыл тұрғындары тау бұлақтарынан келген ашық су көздерін пайдаланып отыр. Көгілдір отын мәселесіне келгенде, мердігерлік мекемен шарт жасасып қазіргі таңда 372 үй газ жүйесіне қосылып, есептегіш құрылғылары орнатылған. Сонымен қатар, қазақта асар жасап, бір-біріне көмектесіп, қолдау көрсету дәстүрі бар. Қайырымдылық шараларынан шет қалмайтын ауыл азаматтары және «Қарекет» қорының демеушілігімен ауыл тұрғыны, бірінші топтағы мүгедек Сайлаукүл Малайсариеваға асарлатып 5 бөлмелі үй салынып, табысталды. Сондай-ақ, былтыр демеушілердің көмегімен салынған стритворкаут балалар ойын алаңшасы қолданысқа берілді. Кәсіп ашып, нәсіп тапқысы келетіндерге мемлекет тарапынан ұдайы қамқорлық жасалынуда. Осы ретте, кенендік бір-қатар шаруа қожалықтары жеңілдетілген пайызбен ауылшаруашылығы техникаларын тізгіндеген. Содан соң аудан әкімі сөз алып, елді мекендердің әлеуметтік-экономикалық дамуының өзекті мәселелерін сөз етіп, алдағы міндеттерімен бөлісті.
«Мемлекеттік бағдарламалар аясында ауылдар көркеюде. Кенен ауылында атқарылар шаралармен бөлісер болсам, ағымдағы жылы Жамбыл көшесін жарықтандыру жұмыстарына аудандық бюджеттен қаржы қаралып, жарықтандыру жұмыстары атқарылатын болады. Сонымен қатар, қазіргі таңда «Ұзын-су» су қоймасына құрылыс жұмыстарын жүргізуге жобалық сметасы әзірленуде.
Көше атауларын жаңарту мәселелері, ауылішілік көшелерді күтіп ұстау мен абаттандыруға қаржы бөлініп, алдағы уақытта тиісті жұмыстар қолға алынады», — деді Бегзат Сейсенқұлұлы.
Аудан әкімінің баяндамасынан кейін сұрақ-жауап бөліміне кезек берілді. Ауыл тұрғындары тарапынан көтерілген сауалдарды мұқият тыңдаған аудан әкімі арнайы сала басшыларына заңдылықтар аясында шешуді тапсырып, шешілу жолдарын қарастыруға міндеттеді.
