Мемлекеттік тіл – бұл мемлекеттің ресми құжаттарында қолданылатын, халықтың байланысын нығайтатын, мәдениеті мен тарихын көрсететін негізгі тіл. Қазақстан Республикасында мемлекеттік тіл болып қазақ тілі белгіленген. Тіл – тек қарым-қатынас құралы ғана емес, ол халықтың рухани байлығы, ұлттық мәдениеттің айнасы болып табылады.
Мемлекеттік тілдің басты міндеті – халықты біріктіру. Қазақ тілінің қоғамдағы рөлі тек тілдік емес, әлеуметтік, мәдени және саяси мәнге де ие. Ол ұлттың бірлігін қамтамасыз ететін, ұрпақтан-ұрпаққа мәдени мұраларды жеткізетін басты құрал болып табылады.
Қазақ тілін білу – Қазақстан азаматтарының мемлекет алдындағы жауапкершілігін сезінуге және елдің ортақ мәдениетін, дәстүрін тереңірек түсінуге мүмкіндік береді.
Қазіргі таңда қазақ тілі Қазақстанда мемлекеттік тіл ретінде ресми қызмет атқарады.
Мемлекеттік органдарда, мектептерде, жоғары оқу орындарында қазақ тілі пәні оқытылады. Сонымен қатар, қазақ тілінде шығатын газет-журналдар, телеарналар мен радиостанциялар жұмыс істейді. Бұл қазақ тілінің қоғамда кеңінен қолданылуына, әрі оның мәртебесінің өсуіне ықпал етеді.
Қазақстан Республикасының Тіл туралы Заңы, «Қазақстан-2050» стратегиясы мен «Үш тілде білім беру» бағдарламасы – мемлекеттік тілдің дамуы мен қолданысын арттыруға бағытталған маңызды құжаттар. Бұл бағдарламалардың басты мақсаты – үш тілді меңгерген жастарды тәрбиелеу, ұлттық мәдениет пен тілдің дамуына зор ықпал жасау.
Мемлекеттік тілдің дамуына кедергі келтіретін факторлар да жоқ емес. Олардың арасында экономикалық жағдай, қазақ тіліндегі кәсіби мамандардың жетіспеушілігі, ақпараттық технологиялар саласында қазақ тілінің аз қолданылуы және тағы басқа мәселелер бар. Алайда, тілдің дамуы тек мемлекеттік органның ғана емес, әрбір азаматтың жауапкершілігінде екенін ескеру қажет.
Қазақ тілінің дамуы – тек тілдің өсуі ғана емес, ол ұлттың мәдениеті мен тарихын, дәстүрлерін сақтау мен дамыту болып табылады. Әрбір азамат мемлекеттік тілді меңгеру арқылы өз мәдениетіне құрмет көрсете отырып, елдің болашағына үлес қосады. Сондықтан қазақ тілін дамытуға әрбір адамның атсалысуы маңызды.
А.Альханова, Қордай аудандық соты әкімшісінің бас маманы
