Қордай ауылындағы Балжан Бөлтірікова атындағы №4 мектеп-лицейінде білім беріп жүрген орыс тілі мен әдебиет пәнінің мұғалімі, педагог-зерттеуші Гүлмира Джунушбаева – еңбек өтілі 37 жылға жеткен тәжірибелі ұстаз. 1993 жылдан бері осы білім ордасында үздіксіз қызмет етіп келе жатқан ол өзінің сабырлы мінезімен, талапшылдығымен және жұмысқа адалдығымен әріптестеріне де, кейінгі жас мамандарға да үлгі болып жүр.
Гүлмира Өмірханқызы бар саналы ғұмырын ұстаздыққа арнап келеді. «Мектеп – менің өмірімнің бір бөлшегі. Бұл жерге келген сайын үлкен жауапкершілік сезімі алға жетелейді», — дейді ұстаз.
Ұзақ жылғы тиянақты еңбегі үшін педагог бірнеше мәрте марапатталған. 2018 жылы – ҚР Білім және ғылым министрінің Алғысы, 2022 жылы – Жамбыл облысы Кәсіподақтар орталығының Құрмет грамотасы, 2024 жылы – «Аманат» партиясынан Құрмет грамота, 2025 жылы – «Облысқа сіңірген еңбегі үшін» белгісімен марапатталды.
Гүлмира Өмірханқызы бұл марапаттарды үлкен жетістік ретінде емес, кәсіби жауапкершілікті арттыратын сенім деп бағалайды.
Ғұмырын білім саласына арнаған жанның тағы бір ерекшелігі – әрдайым ізденісте болуы. Жаңартылған білім мазмұнын меңгеру, әдістемелік семинарларда тәжірибесімен бөлісу – оның күнделікті жұмысында қалыпты құбылыс. 2020 және 2023 жылдары аудандық семинарларда өзінің іс-тәжірибесін көрсетіп, білім бөлімі тарапынан Мақтау қағаздарын алды. 2019 жылы облыстық әдістемелік семинарға қатысып, пәндік жаңашылдықтарды талқылауға үлес қосты.
Сонымен қатар, ол жас мамандарға бағыт-бағдар беруді өз міндетінің бір бөлігі санайды. «Жас ұстаздың алғашқы қадамы сенімнен басталады. Қолдап жіберсең, ол да талай биікті бағындыра алады», — дейді Гүлмира Джунушбаева.
Гүлмира Джунушбаева дайындаған оқушылар жыл сайын түрлі деңгейдегі олимпиадаларда жүлделі орындарға ие болады. Тек 2025 жылдың өзінде бірнеше оқушы республикалық және облыстық білім додаларынан жоғары нәтиже көрсетті. Мәселен, Ғабидин Айдина – ауыл мектептері арасындағы республикалық олимпиадада (1 орын, 3 орын), облыстық олимпиадада (1 орын) жеңіске жетті, «Үздік ауыл мектебінің оқушысы – 2025» атанды. Сыдық Аяжан – республикалық олимпиада 2-орын, облыстық олимпиада 1-орын иеленді. Мурзабаева Азалия – облыстық олимпиада 2-орынды жеңіп алды.
Сонымен қатар, 2024–2025 жылдары «Ақбота» зияткерлік олимпиадаларында ондаған шәкірті ІІ және ІІІ дәрежелі дипломдарға ие болды. Бұрынғы жылдардағы «Дарын» орталығы ұйымдастырған онлайн олимпиада нәтижелері де оның тынбай еңбектенуінің дәлелі.
«Шәкірттерімнің жетістігі – менің еңбегімнің жемісі емес, олардың өз табандылығының нәтижесі. Мен тек дұрыс бағыт көрсетемін», — дейді ұстаз.
2025 жыл – Жұмысшы мамандықтар жылы. Бұл кезеңде ел еңбектің қадірін, түрлі саладағы мамандардың қоғамға қосқан үлесін ерекше атап өтуде. Осындай еңбек иелерінің ішінде білім саласының майталмандары да бар.
Гүлмира Өмірханқызы – өзінің тұрақтылығымен, тиянақты еңбегімен, шәкірт тәрбиелеудегі табандылығымен көпке үлгі болған ұстаз. Ол үшін ұстаздық уақытпен өлшенбейтін, жүрекпен атқарыталатын іс.
«Ұстаз еңбегінің нәтижесі бір күнде көрінбейді. Бірақ жылдар өткен соң, білікті, парасатты адамдарды көргенде – соның ішінде менің де үлесім барын сезіну үлкен бақыт», – дейді кейіпкеріміз.
Гүлмира Джунушбаева – мектептің ғана емес, тұтас ауданның мақтанышы. Жас маманға бағыт көрсетіп, шәкірт өсіріп, білім сапасын көтеруге үлес қосқан ұстаздың адал еңбегі – қоғам үшін бағалы, болашақ үшін маңызды қызмет.
Сәуле МҰХАДИНҚЫЗЫ
