Сарыбұлақ елдімекенінде орналасқан «Нөсер» шаруа қожалығы ауыл шаруашылығында тың істі бастаған үлгілі кәсіпорын ретінде танылып, аудан аумағындағы ауыл шаруашылығы секторының дамуына зор үлес қосуда.
Жалпы, 2013 жылы негізі қаланған бұл қожалық қысқа мерзім ішінде ірі құрылымға айналып, заманауи технологиялар мен техникалық жабдықтармен толық қамтамасыз етілді. Қожалықтағы комбайндар мен тракторлар соңғы үлгідегі техникалар болып, жұмыс тиімділігі мен өнімділігін арттыруға бағытталған.
«Нөсер» шаруа қожалығы жыл сайын өндіріс көлемін ұлғайтып, өзіндік жетістіктерге қол жеткізуде. Бұған дәлел ретінде биылғы жылы 65 гектар жерге егілген «Андромеда» және «Pioneer P0937» сортты жүгері дәндерінің сапасы мен өнімділігін айтуға болады. Бұл жүгері сорттары өзінің жоғары өнімділігі мен тамаша сапасымен ерекшеленеді, сондықтан ол шаруашылық өнімінің табыстылығын арттыруға қызмет етеді. Сонымен қатар, бұл қожалық дәстүрлі дақылдардан бөлек алғаш рет жержаңғақ егу тәжірибесін қолға алды. Жержаңғақ — құрғақшылыққа төзімді, майлы дақыл, Оңтүстік Америкадан шыққан және бұршақ тұқымдасына жататын өсімдік. Бұл дақылдың ерекшелігі — ылғал мен жылуды жақсы қажет етуінде.
Ауыл шаруашылығы бөлімінің статист маманы Ғалымжан Оспановтың пікірінше, жержаңғақ өнімі Қордай ауданының жаңа брендіне айналуы әбден мүмкін.
Мал шаруашылығы саласында да «Нөсер» қожалығы белсенділік танытып, 700 бас бұқаны бордақылау алаңында бордақылауда. Бұл мал азығын ұстап, олардың өсуін қамтамасыз ету арқылы қожалық ауыл экономикасына елеулі үлес қосуда. Бордақылау алаңының дамуы әрі қарай өнім алу көлемін арттырып, ауылдық жерде еңбекпен айналысуға жағдай туғызады.
«Нөсер» шаруа қожалығы өз өрісін кеңейтіп, ауыл шаруашылығының әр саласында жаңалықты енгізіп, тиімділік пен сапаға басымдық беруде. Кәсіпорын — заманауи техника және тәжірибелі мамандардың еңбегі арқасында, аудан экономикасының өркендеуіне елеулі үлес қосып келеді. Қожалықтың еңбегі әрі қарай да ауыл шаруашылығы саласын дамытуда үлгі болары сөзсіз.
Әділет ҚҰТТЫБАЙ
