Ауылдағы тіршіліктің тынысы жаңа леппен дамуда. Осы өзгерістің нақты көрінісі Қордай ауылындағы «Ынтымақ» шаруа қожалығының табысты жұмысында айқын байқалады. Жылдар бойы етене еңбек етіп, өз саласындағы кәсібін дамытып отырған бұл қожалық қазіргі таңда мал шаруашылығында үлкен үлес қосып отыр.
Мұнда қазақи қой мен бұқа саны жылдан-жылға көбейіп, мал басының сапасы да жоғары деңгейге көтерілуде. Бұл жетістікке жету оңай болмағанын шаруа қожалық басқарушысы Дәурен Асанов өз сөзімен айтты.
«Қазір «Ынтымақ» – біздің мақтанышымыз. Бұл – қарапайым шаруашылық емес, үлкен бір кәсіп, өмірдің өзі деп айтуға болады. Біз мал баптауда тек санға ғана емес, сапаға баса назар аударамыз. Қазақи қой баптау, олардың денсаулығын қадағалау – біздің басты міндетіміз. Бұқа саны да жеткілікті, олар селекцияға да және екінші дәрежелі өнім өндіруге де қолайлы. Мақсатымыз – ауылдың дәстүрлі шаруашылығын заманауи технологиямен ұштастырып, оны өркендету», — дейді ол.
Қожалықтың ауыл экономикасына қосатын үлесі орасан. Жергілікті тұрғындардан құралған жұмысшылар тобы өз ісіне адал және еңбексүйгіш. Олар жүргізуші, бақташы, ветеринар сияқты маңызды қызметтерді жоғары жауапкершілікпен атқарады. Әрбір жұмыстың орны толмас маңызы бар екендігін ескерсек, осы қарапайым адамдардың еңбегі қожалықтың табысты дамуына негіз болып отыр.
«Біздің жұмысшылар – еңбекқор команда. Әрбір адам өз ісіне жауапкершілікпен қарайды, малға деген сүйіспеншілік танытады. Бұл – бізді алға жетелейтін күш», — дейді Дәурен Асанов.
Жыл сайын «Ынтымақта» малдың саны тұрақты түрде өсіп қана қоймай, олардың жағдайы да жақсаруда. Заманауи мал күтімі құралдары енгізіліп, жануарларға әр қилы азықтар дайындалып келеді. Бұл – кәсіптің тұрақтылығын және оның болашағын қамтамасыз ететін маңызды қадамдар.
«Ынтымақ» құрылымы тек кәсібін дамытып қана қоймай, ауыл тұрғындарының әл-ауқатын көтеруге бағытталған әртүрлі әлеуметтік жобаларды да жүзеге асыруда. Бұл – заманауи ауыл шаруашылығындағы тың бастамалардың бірі. Қожалықтың жетістігі басқаларға үлгі болары анық.
Осының бәрі ауылдың дамуына деген үлкен үмітті ұялатады. Малшылар мен егіншілердің еңбегі арқасында ауыл өз мүмкіндіктерін кеңейтіп, болашаққа сенімді қадам басып жатыр. Қордайдағы «Ынтымақ» сияқты жұмысқа жауапты және тәжірбиелі шаруа құрылымдары ауыл өмірінің жаңғыруының, экономикалық өсуінің негізін қалайды. Бұл – дәстүр мен заманауи талаптарды үйлестірген табысты үлгі. Қазақ «Ырыс алды – ынтымақ» деп бекер айтпаған. Ауылдағы әр отбасының, әр еңбек иесінің өмірінде осындай жақсы өзгерістер кездессе ғана еліміздің агросекторы шынымен де гүлдене түседі.
Әділет ҚҰТТЫБАЙ
