Қасиетті Рамазан айы тағы да табалдырығымыздан аттады. Он екі айда бір келетін бұл мейірім мен береке айы мұсылман қауымы үшін ерекше қасиетке ие. Жер бетіндегі миллиардтаған мұсылмандар осы айда Алланың ризалығын іздеп, ораза ұстап, құран оқып, дұға жасап, жақсы амалдарға ұмтылады.
Рамазан – тек тамақ пен судан тыйылу емес. Бұл – жанның тазаруы, мінездің түзелуі, жүректің нұрлануы. Пайғамбарымыз (оған Алланың салауаты мен сәлемі болсын): «Кімде-кім Рамазан айында иманмен және сауап үміт етіп ораза ұстаса, оның өткен күнәлары кешіріледі» деген еді. Осы хадис әрбір мұсылманға үлкен үміт сыйлайды.
Бұл айда түсетін Құран Кәрім – адамзатқа түскен ең ұлы кітап. «Бақара» сүресінде Алла Тағала: «Рамазан айы – адамдарға тура жол көрсету, ақиқат пен жалғанды ажырату үшін Құран түсірілген ай» деп баяндайды. Демек, Рамазан – Құран айы. Осы айда әрбір мұсылман Құранды көбірек оқып, оның мағынасын түсінуге, жүрегіне сіңіруге тырысуы тиіс.
Рамазан – ынтымақ пен мейірім айы. Ауыз бекіткен адам аш-жалаңаштың халін сезінеді. Сондықтан қайырымдылық, садақа, ауызашар беру осы айда ерекше сауапқа айналады. Көрші-қолаңға, туыс-туғанға, мұқтаж жандарға қол ұшын созу – Рамазанның ең әдемі әдеті.
Құрметті оқырман! Бүгінгі қарбалас заманда Рамазанды тек дәстүр ретінде өткізіп қоймай, шынайы рухани жаңаруға айналдырайық. Телефонды бір сәтке қойып, отбасымен бірге ауызашар жасап, тарауих намазына барып, түнгі дұғаларда Алладан кешірім сұрап, жақсылық тілеу – осының бәрі біздің қолымызда.
Қош келдің, Рамазан! Сенімен бірге келген берекеге, мейірімге, кешірімге шүкіршілік етеміз. Ораза ұстағандарымыздың оразасы, оқыған құрандарымыз, жасаған дұғаларымыз қабыл болсын. Әрбір отбасына татулық, денсаулық, молшылық нәсіп етсін!
Рамазан айыңыз құтты болсын! Алла Тағала баршаңыздың амалдарыңызды қабыл еткей!
Азамат БЕРІКҰЛЫ, Қордай ауданының Бас имамы
