Гвардейск гарнизонында «Оңтүстік» өңірлік қолбасшылығына қарасты әскери бөлімдердің батальон, дивизион командирлері тәрбие және идеологиялық жұмыстары жөніндегі орынбасарларымен оқу-әдістемелік жиын өтті.
Оқу-әдістемелік жиын «Оңтүстік» өңірлік қолбасшылығы әскерлері қолбасшысының тәрбие және идеологиялық жұмыстары жөніндегі орынбасары полковник Ораз Кучуковтың басшылығымен өткізілді.
Жиынның мақсаты – батальон, дивизион командирлері тәрбие және идеологиялық жұмыстары жөніндегі орынбасарларының кәсіби дағдыларын жетілдіру, жеке құрамды оқыту мен тәрбиелеу мәселелерінде әскери регламенттерінің мақсаттары мен міндеттерін зерделеу, тәрбиеші офицерлерді бағыныштыларды рухани, адамгершілік және құқықтық тәрбиелеудің әдіс-тәсілдеріне үйрету, мемлекеттік-құқықтық дайындық бойынша сабақтар ұйымдастыру қабілетін тексеру, тәрбие және идеологиялық мақсаттар мен міндеттерді дұрыс анықтай білу, бағынышты жеке құрамның санасына жеке мысал мен сендіру әдісі, қабілет арқылы әсер ету тапсырмаларын сәтті орындауға ынталандыру болды.
Жиын барысында бірнеше бағыттар бойынша сабақтар өткізілді. Атап айтқанда – жеке құрамды ақпараттандыру, мемлекеттік-құқықтық дайындық сабағы мен тәрбие жұмысын ұйымдастыру, оқу-жаттығу барысында арнайы насихаттау техникасының жұмысы мен жауынгерлік ақпараттандыруды жүргізу, радиогазет шығару, оқу-жаттығу кезіндегі далалық ақпараттандыру тәрбие жұмысы бөлмесінде жұмысты ұйымдастыру, атыс дайындығында нормативтерді орындау нәтижелері бойынша қорытынды шығару, оқу-жаттығу барысындағы психологиялық көмек, оңалту далалық пунктінің жұмысы, үгіт-насихат снарядының жабдықтарымен жұмысты ұйымдастыру әдістері бойынша сабақтар жүргізілді.
– Жиын қатысушыларына жеке құрамды оқытудағы кәсіби іскерлігі мен дағдыларын арттыруға бағытталған мақсаттар мен міндеттер қойылды. Жиында тәрбие және идеологиялық жұмысты ұйымдастырудағы жаңа тәсілдер қарастырылды. Батальон командирлері орынбасарларының мемлекеттік-құқықтық дайындық, ақпараттандыру, тәрбие жұмысы бойынша сабақ ұйымдастыру қабілеттерін тексеру мақсаттары қойылды. Офицерлердің графикалық және мәтіндік құжаттармен жұмыс істеу дағдылары мен бөлімшелерді, взводтарды үйлестіру барысында моральдық-психологиялық қамтамасыз етуді ұйымдастыру мәселелері бойынша жұмыс істеу дағдылары тексерілді. Сондай-ақ дене шынықтыру мен атыс дайындығы бойынша нәтижелер тексерілді. Жалпы тәрбие және идеологиялық жұмыс офицерлерінің деңгейі күн сайын жақсарып келе жатқанын атап өткен жөн. Біз білім беру құрылымдарының офицерлері жеке құраммен жұмыс істей алады деп сенімді түрде айта аламыз. Олар жауынгерлік даярлық іс-шараларына қатысуға қабілетті, — деді «Оңтүстік» өңірлік қолбасшылығы басқармасының тәрбие және идеологиялық жұмыс бағытының аға офицері полковник Әйбек Жүсіпов.
Жиын соңында полковник Ораз Кучуков оқу-әдістемелік жиын қорытындысы бойынша жақсы нәтиже көрсеткен офицерлерге грамоталар мен бағалы сыйлықтар табыстады.
Гвардейск гарнизонының
баспасөз қызметі
