Мемлекеттік «Жастар тәжірибесі» бағдарламасы Қордай ауданында өзінің тиімділігін дәлелдеп келеді. Бұл бағдарлама студенттік өмір мен нақты еңбек нарығы арасындағы сенімді көпірге айналып отыр. Жас маман Наджафова Рано Назировнаның тағдыры – мемлекеттік қолдау мен білікті тәлімгерліктің мамандыққа жол ашудағы жарқын үлгісі.
Колледж немесе жоғары оқу орнын тәмамдаған әрбір түлек бір мәселеге тап болады: жұмыс берушілер тәжірибені талап етеді, ал кешегі студент оны қайдан алады? Қордай ауданында бұл мәселе Жұмыспен қамту орталығы арқылы сәтті шешілуде. Орталық диплом алған жас мамандарды «Жастар тәжірибесі» бағдарламасына белсенді түрде жолдайды.
Рано Наджафованың еңбек жолы қоғамға пайдасын тигізуге, мектепте жұмыс істеуге және балалар тәрбиесіне үлес қосуға деген шынайы ниеттен басталды. Оқу орнын аяқтаған соң ол уақыт жоғалтпай, жергілікті Жұмыспен қамту орталығына жүгінді. Оған «Жастар тәжірибесі» бағдарламасына қатысу ұсынылып, осы мүмкіндік оны «BILIM-DOS» жалпы білім беретін мектебіне алып келді.
Бұл жерде Рано тек жұмыс берушілерді ғана емес, өз ісіне берілген әріптестер мен мықты басқарушылық қолдауды кездестірді. Жас маман үшін қолайлы орта қалыптасып, кәсіби тұрғыдан дамуына барлық жағдай жасалды.
Жас педагогтың қалыптасуында мектеп директоры әрі тәлімгері Лариса Максимованың рөлі ерекше болды. Оның қамқор жетекшілігінің арқасында практика өмір мектебіне айналды.
«Менің тәлімгерім Лариса Петровна маған кәсіби жолымдағы ең маңызды сабақты үйретті. Ол – балалармен ғана емес, олардың ата-аналарымен де дұрыс қарым-қатынас орнатып, әрқайсысына жеке тәсіл табу. Бұл – оқулықтан үйрене алмайтын нәзік психология», – дейді Рано.
Мектеп басшылығының қолдауының арқасында кешегі түлек жұмыс ырғағына тез бейімделіп қана қоймай, өзіне деген сенімділікке ие болды. Бағдарлама оған таңдаған мамандығының маңызын тереңірек түсінуге, өз мүмкіндіктерін бағалауға және алғашқы еңбекақысын алуға мүмкіндік берді. Бұл кез келген жас адам үшін үлкен ынталандыру болып табылады.
Рано Наджафованың мысалы Қордай ауданында аталмыш бағдарламаның қаншалықты тиімді жұмыс істейтінін айқын көрсетеді.
Бағдарлама бірнеше маңызды міндетті қатар шешеді:
өңірдегі жастар арасындағы жұмыссыздық деңгейін төмендетеді;
жас мамандардың алғашқы жұмыс орнына бейімделуін жеңілдетеді;
аудан ұйымдарына ынталы әрі болашағы зор қызметкерлерді табуға көмектеседі.
Бүгінде Рано – өз болашағын айқын көретін, өзіне сенімді маман. Қазіргі таңда таңдау алдында тұрған Қордай ауданының студенттері мен түлектеріне ол мынадай кеңес береді:
«Қорықпаңыздар! Алға ұмтылыңыздар, кішкентай қадамнан бастаңыздар. Міндетті түрде мүмкіндіктерді пайдаланыңыздар. Дәл осы жерде болашақ мансаптың іргетасы қаланады, кәсіби тәжірибе жинақталады және ең бастысы – өз күшіңізге деген мызғымас сенім қалыптасады».
Карима АХАН
