Өмірде біз кез келген жағдайға дайын болуымыз керек, бірақ кейде оқыс оқиғалар бізге күтпеген жерде кездесіп, қапелімде кімнен көмек сұрарыңды білмей қалатының анық. Бірақ сол жағдай біздің өмірімізді күрт өзгертіп, санамызды сілкіп, бір сәтте бәрін қайтадан бағалауға мәжбүр етеді. Сол кездегі адамдардың әрекеттері мен шешімдері бізді барлығын бағалауды үйрететін сияқты.
Бұл оқиға наурыз айында орын алыпты. Көгадыр ауылының тұрғыны Таңатар Баекенов өз автокөлігімен Қордайдағы Жібек жолы көшесінде келе жатып, денсаулығы аяқ астынан сыр беріп, рөлді басқару қабілетінен айырыла бастайды. Тіпті қарсы бетке шығып барып, әупіріммен өз жолағына қайта оралып, көп ұзамай жол шетіне тоқтауға мүмкіндік алады. Жүргізушінің мұндай оғаш әрекетін жұмыс барысымен бара жатқан аудан әкімі Бегзат Болатбеков байқап қалып, құқық қорғау органдарына хабар береді. Шұғыл аталмыш жерге аттанған полиция қызметкерлері соңынан жетіп, жүргізушінің жағдайына бірден көз жеткізіп, оны өз көліктеріне отырғызып, тез арада аудандық орталық ауруханаға жеткізеді.
Дәрігерлер тексеруінен өткен Таңатар ағада инсульт белгілері анықталып, бірден жан сақтау бөліміне жатқызылады.
Үш күн жан сақтау бөлімінде жатқан жүргізуші емделіп шыққан соң, редакциямызға келіп, болған мән-жайды өзі айтып берген еді.
«Шынымды айтар болсам, ол жігіттер менің өмірімді сақтап қалды. Олардың жедел әрекетінің арқасында мен аман қалдым. Әрине, дәрігерлерге де айтар алғысым шексіз. Бірақ полиция қызметкерлерінің бұл әрекетіне үлкен ризашылығымды білдіремін. Олар барлық жақсылықтарға лайық», — дейді Таңатар Молдашұлы.
Осы орайда, көлік жүргізіп келе жатып денсаулығы сыр берген жанға дереу көмек қолын созған полиция қызметкерлерінің кім екенін көп ұзамай білдік. Олар Қордай аудандық полиция бөлімінің жергілікті полиция қызметі бөлімшесінің жол патрульдік полиция тобының инспекторы, полиция аға лейтенанты Мұрат Лаков пен Қордай аудандық полиция бөлімінің Сортөбе полиция бөлімшесінің қызмет инспекторы, полиция лейтенанты Нұрүстем Марат екен.
Қос полиция қызметкеріне тек қызметтік тұрғыда ғана емес, адами қылықтары үшін де бәрекелді деп айтуға тұрарлық. Лайым, солай болғай.
Ж.ОМАРОВ
