Қордай ауданы, Қордай ауылындағы Батыс шағын ауданында қуаты 35 кВ болатын жаңа электрмен жабдықтау нысанының салтанатты ашылуы өтті.
Ашылу рәсіміне жиылғандардың арасында Қордай ауданы әкімінің орынбасары Бақыт Сахатов, аудан әкімдігінің құрылыс бөлімінің басшысы Бауыржан Жәнетұлы мен аудандық «АЭЖ» мекемесінің өкілдері, сала мамандары және мердігер мекеме өкілдері болды.
Ашылу барысында жауапты тұлғалар жаңа электрмен жабдықтау нысанының аудан тұрғындары үшін атқарар рөлі мен маңыздылығына тоқталды. Нысанның іске қосылуы «Батыс» шағын ауданының электр жабдықтау желілеріне түсетін жүктемені айтарлықтай азайтуға мүмкіндік беретіндігі атап өтілді. Бұл жаңа нысан тұрғындарды үздіксіз әрі қауіпсіз электр қуатымен қамтуға бағытталған, соның нәтижесінде адамдар электр қуатын үзіліссіз пайдалана алады.
Бұдан бөлек, жаңа электрмен жабдықтау нысаны ауданның инфрақұрылымдық әлеуетін арттырып, жоспарланып отырған құрылыс пен даму жұмыстарын жүзеге асыруға жол ашады. Халықтың әл-ауқатын көтеру мақсатында, жаңа нысан ауданның экономикалық дамуына да өз әсерін тигізеді.
Жоба аясында екі трансформатор орнатылған, олардың әрқайсысының қуаты 4000 кВА-ны құрайды. Жалпы жобаның қуаты – 35 кВ. Нысанның құрылыс жұмыстарына 922,7 млн теңге қаржы жұмсалған.
Жаңа электрмен жабдықтау нысаны Батыс шағын аудан тұрғындары үшін үлкен мүмкіндік туғызып, энергияның тұрақты көзін қамтамасыз етеді. Аудан тұрғындары тек қана қазіргі уақытта емес, болашаққа да сенімділікпен қарай алады. Нысанның ашылуы – бұл тек қана қысқа мерзімді жетістіктер емес, ұзақ мерзімді тұрақтылық пен даму жолындағы қадам.
Сәуле МҰХАДИНҚЫЗЫ
