Бүгінгі таңда цифрландыру әлемнің барлық салаларын өзгертіп, жаңа мүмкіндіктер ашуда. Ол мемлекеттік басқару, бизнес, білім беру, медицина, байланыс секілді көптеген салаларға енді. Цифрландыру – тек технологиялық процесс емес, бұл адамның өмір сүру деңгейін жақсартып, уақыт пен ресурстарды үнемдеуге бағытталған маңызды қадам.
Цифрландырудың маңызы мен артықшылықтары
Цифрландырудың басты мақсаты – процестерді оңтайландыру және қызметтерді халыққа барынша қолжетімді ету. Мысалы, Қазақстандағы электронды үкімет жүйесі (eGov) азаматтарға мемлекеттік қызметтерді онлайн түрде алуға мүмкіндік береді. Бұрын бірнеше күн не апта талап етілетін құжат рәсімдеу, салық төлеу немесе дәрігерге жазылу сияқты процестер қазір бірнеше минут ішінде орындалады.
Бизнес саласында цифрландырудың ықпалы зор. Kaspi.kz, Wildberries сияқты платформалар тек сауда мен қаржы қызметтерін ғана емес, сонымен қатар тұтынушыға жылдам әрі сапалы қызмет көрсетуді қамтамасыз етеді. Осының арқасында онлайн сауда қарқынды дамып, жаңа жұмыс орындары пайда болуда.
Білім беру саласында да цифрлық технологиялардың орны ерекше. Онлайн курстар, цифрлық оқулықтар, білім беру платформалары шалғай ауылдардағы оқушылар мен студенттерге білім алуға мүмкіндік береді. Әсіресе, пандемия кезеңінде бұл әдіс тиімділігін дәлелдеді.
Медицинада цифрландыру телемедицина арқылы жаңа деңгейге көтерілді. Ауыл-аймақтардағы тұрғындар қазір онлайн кеңес алып, медициналық көмекке жүгінуде. Электрондық денсаулық сақтау карталары да дәрігерлердің жұмысын жеңілдетті.
Қиындықтары мен шешімдері
Цифрландырудың көптеген артықшылықтарына қарамастан, белгілі бір мәселелер де бар. Олардың қатарында киберқауіпсіздік, хакерлік шабуылдар және деректердің ұрлануы. Сонадй ақ, кадр тапшылығы, цифрлық технологияларды меңгерген мамандардың жеткіліксіздігі, цифрлық теңсіздік. Бұл мәселелерді шешу үшін мемлекет пен бизнес цифрлық инфрақұрылымды дамытуда, IT мамандарды даярлауға ерекше көңіл бөлуде. Сонымен қатар, халықты цифрлық сауаттылыққа оқыту бағдарламалары іске қосылуда.
Болашаққа қадам
Цифрландыру – уақыт талабы. Ол тек өмірді жеңілдетіп қана қоймай, ел экономикасының дамуына, білім мен медицинаның сапасын арттыруға ықпал етеді. Дегенмен, технологияларды дұрыс әрі тиімді қолдану – басты міндет. Әрбір адам цифрландырудың артықшылықтарын толық сезініп, жаңа заманның мүмкіндіктерін пайдалана алуы қажет.
Цифрландыру – бұл тек технология емес, бұл жаңа дәуірдің негізі.
Дара Есен, Абылайхан атындағы Халықаралық қатынастар және Әлем тілдері университетінің 1 курс студенты
