Қазақстан Республикасы Қаржы вице-министрі Абзал Бейсенбекұлы мен Қазақстан Республикасының Қорғаныс министрі Айдос Сәкенұлы Жамбыл облысына жасаған жұмыс сапары аясында Қордай ауданына келді.
Сапар барысында делегация өңірдегі биофармацевтика саласының дамуымен, биологиялық қауіпсіздікті қамтамасыз ету бағытында атқарылып жатқан жұмыстармен және ғылыми-зерттеу инфрақұрылымының жай-күйімен танысты. Жұмыс сапары аясында Қаржы вице-министрі Жамбыл облысы әкімінің бірінші орынбасары Нұржан Календеров пен Қордай ауданының әкімі Бегзат Болатбековтің қатысуымен Гвардейск кентінде орналасқан «OtarBioPharm» биофармацевтикалық зауытының қызметін аралап көрді. Кездесу барысында қонақтарға зауыттың өндірістік мүмкіндіктері, иммунобиологиялық препараттарды өндіру үдерісі және кәсіпорында жүзеге асырылып жатқан жұмыстар таныстырылды. Атап айтқанда, GMP халықаралық стандартының талаптарына сәйкес жұмыс істейтін өндірістік цехтың қызметіне назар аударылды. Бұл стандарт дәрілік препараттарды өндіру барысында өнім сапасын, қауіпсіздігін және өндірістік үдерістердің тиісті талаптарға сәйкестігін қамтамасыз етуге бағытталған. Зауыттың қызметімен танысу барысында биофармацевтикалық өндірістің маңыздылығы, заманауи технологияларды қолдану және сапалы иммунобиологиялық препараттар өндіру мәселелері сөз болды. Мұндай өндіріс орындарының дамуы отандық фармацевтика саласының әлеуетін арттыруға және биологиялық қауіпсіздікті қамтамасыз ету бағытындағы жұмыстарды жетілдіруге ықпал етеді.
Бұдан кейін делегация Биологиялық қауіпсіздік проблемалары ғылыми-зерттеу институтының қызметімен танысты. Институт мамандары ғылыми мекеменің негізгі жұмыс бағыттары, жүзеге асырылып жатқан зерттеулер және биологиялық қауіпсіздікті қамтамасыз ету саласындағы ғылыми ізденістер туралы мәлімет берді.
Аталған ғылыми-зерттеу институты биологиялық қауіпсіздік мәселелерін зерттеу, қауіпті биологиялық факторларды зерделеу және осы бағыттағы ғылыми әлеуетті дамыту бойынша маңызды жұмыс атқарады. Сапар барысында ғылыми зерттеулердің маңызына, зертханалық инфрақұрылымның мүмкіндіктеріне және заманауи ғылыми-техникалық шешімдерді қолдану мәселелеріне назар аударылды. Сонымен қатар, делегацияға аса қауіпті патогендер коллекциясын сақтауға арналған жерасты қоймасының және биологиялық материалдардың генетикалық қорын сақтауға бағытталған биобанктің құрылысы көрсетілді. Аталған нысандардың құрылысы ғылыми-зерттеу жұмыстарына қажетті инфрақұрылымды дамыту және биологиялық материалдарды тиісті талаптарға сай сақтау мүмкіндіктерін кеңейту тұрғысынан маңызды. Нысандармен танысу барысында олардың мақсаты, құрылыс жұмыстарының барысы және алдағы уақытта атқаратын қызметі жөнінде ақпарат ұсынылды.
Жұмыс сапарының жалғасында Қаржы вице-министрі институт қызметкерлеріне арналған әлеуметтік инфрақұрылым нысандарын аралады. Атап айтқанда, көпқабатты тұрғын үйлер мен акт залы қарастырылған спорт кешенінің жай-күйімен танысты.
Сапар соңында Қаржы вице-министрі институт ұжымымен кездесіп, мекеме қызметіне қатысты бірқатар мәселелерді талқылады.
Жалпы, жұмыс сапарының негізгі мақсаты – Қордай ауданында орналасқан биофармацевтикалық өндіріс пен ғылыми-зерттеу мекемелерінің қызметімен танысу, биологиялық қауіпсіздік саласындағы жұмыстардың барысын бағамдау және әлеуметтік инфрақұрылым нысандарының жай-күйін зерделеу.
