Жамбыл өңірінде спорттың серпінді дамуында Қордай ауданының алар орны ерекше. Аудан спортшылары спорттық бәсекелерде ел намысын абыройлы қорғап, аудан атын облыстық және халықаралық ареналарда танытуда.
Жуырда, 4-тен 10 қыркүйекке дейін Қырғыз Республикасының Ыстықкөл облысы, Бостери ауылында Тәуелсіз Мемлекеттер Достастығы мен Шанхай Ынтымақтастық Ұйымына мүше елдердің қатысуымен ерекше мәнге ие болған «Азия – аймақтық ынтымақтастық пен бейбітшілік» ұранымен XXV Халықаралық Ыстықкөл спорттық ойындары өтті. Бұл халықаралық спорттық дода еліміз үшін ғана емес, бүкіл аймақ үшін де маңызды оқиғаға айналды. Бұл бәсекеде Қордай ауданының ардагерлер командасы өзінің шеберлігін паш етіп, III орынды иеленіп, ауданымыздың спорттық құрметін асқақтатты. Ардагерлердің бұл жетістігі – үлкен тәжірибенің жемісі ғана емес, ауданымыздың спорттық әлеуетінің беріктігінің нақты дәлелі. Ардагерлердің бұл жеңісі – барлық аудан тұрғындары үшін үлкен мақтаныш. Бұл спортшылардың еңбегі жастарды шабыттандырып, олардың спортқа деген қызығушылығын арттыратыны сөзсіз.
Сонымен қатар, жастарымыз да спорттың әртүрлі түрлерінде жақсы нәтижелерге қол жеткізуде. Әсіресе, Жамбыл облысында өткен бокстан чемпионатта Қордай ауданының жас былғары қолғап шеберлері зор табыстарға жетті. Бұл жарыста ауданның №17 балалар мен жасөспірімдер спорт мектебінің тәрбиеленушілері 1 алтын және 2 қола медаль жеңіп алып, өздерінің бокс саласындағы шеберліктерін кеңінен танытты. Бұл жеңістер жас спортшылардың қажырлы еңбегі мен жоғары деңгейлі жаттығулардың нәтижесі екенін атап өту керек.
Одан әрі, «AUYL SPORT – 2026» деп аталатын ауыл балалары арасындағы облыстық турнирде Қордай ауданынан шыққан жас палуандар еркін күрес бойынша бозкілемде өнерлерін көрсете отырып, II және III орындарды иеленді. Бұл жетістік – олардың табандылығы мен жігерінің жемісі ғана емес, сондай-ақ жаттықтырушылардың кәсіби тұрғыдан дайындауының нәтижесі. Мұндай жетістіктер – жергілікті спортқа деген үлкен ықпал, жастардың денсаулығы мен болашағына деген сенімнің айғағы. Спортшылардың осындай табыстары ауданның спорттық дамуының айқын көрсеткіші. Бұл – қарапайым дене шынықтырудан бастап халықаралық деңгейдегі жарыстарға дейінгі жолда үлкен жетістіктерге жетуге болады деген нақты дәлел.
Қордай ауданының спорт саласындағы осындай жоғары деңгейдегі жетістіктері алдағы уақытта да жалғасын табады деп сенеміз. Алдағы жарыстарда жемісті жол, мықты денсаулық және көптеген жеңістер тілейміз!
