25 қазан — Қазақстанның тәуелсіздік пен егемендікке апарар жолының басталуын бейнелейтін, еліміздің басты мемлекеттік мерекелерінің бірі – Республика күні. Бұл күн тек тарихты еске алу ғана емес, сонымен қатар бүгінгі ұрпақтың бойында отансүйгіштік пен азаматтық жауапкершілікті қалыптастыра отырып, еліміздің жетістіктерін бағамдауға және болашаққа сеніммен қарауға мүмкіндік береді.
Осы тұрғыда Ахмет Байтұрсынұлы атындағы орта мектепте жүргізіліп жатқан патриоттық тәрбие жұмысы — егемен ел жастарын тәрбиелеудегі жарқын үлгі. Мұндағы кадет сыныптары – жай ғана оқу емес, тәртіп пен құрметке, патриотизмге негізделген тұтас тәрбие жүйесі.
Кадет сыныптарында оқушылар ҚР Қорғаныс министрлігі, Ішкі істер министрлігі, Төтенше жағдайлар министрлігі және басқа да күш құрылымдарында қызмет етуге мақсатты түрде дайындалады. Оқу үрдісі ерекше тәртіппен ұйымдастырылған: күннің бірінші жартысы жалпы білім беретін пәндерге арналса, екінші жартысы саптық және атыс дайындығы, әскери-патриоттық тәрбие, алғашқы әскери дайындық сабақтарына бағытталған. Барлық курсанттар мектеп ұсынған арнайы әскери форманы киеді. 7-сыныпта ант қабылдағаннан кейін оларға алғашқы шендер беріледі. Үлгілі тәртібі мен үздік оқу жетістіктері үшін кадеттерге жоғары дәреже беріліп отырады. Әр сыныпта өз старостасы – взвод командирі бар.
Сонымен қатар, оқушылар тұрақты түрде күштік құрылымдардың өкілдерімен кездесіп, практикалық сабақтарда алған дағдыларын көрсетеді. Кадет сыныбына қабылдану үшін үміткерлер математика мен оқу пәндері бойынша емтихан тапсырып, дене даярлығы нормативтерінен өтеді және тарих не география пәнінен «4» пен «5» аралығындағы бағаға ие болуы тиіс.
Ахмет Байтұрсынұлы атындағы мектептегі кадет қозғалысы 2018 жылы Ішкі істер министрлігінің жолдамасымен 6 «В» сыныбынан бастау алды. Алғашқы нәтижелер бірден көрініс берді: оқушылардың үлгерімі, тәртібі мен мектеп өміріне белсенді қатысуы артты. Бұл тәжірибе басшылыққа кадет қозғалысын одан әрі кеңейтуге түрткі болды.
Қозғалыстың жетекшісі — запастағы капитан, бастауыш әскери дайындық пәнінің оқытушы-ұйымдастырушысы Әнуар Мұхитұлы Қашқымбаев. Ол Қордай ауданындағы «Жас сарбаз» әскери-патриоттық қозғалысының өңірлік өкілі болып табылады.
2024–2025 оқу жылында мектептен ҚР ІІМ желісі бойынша дайындалған алғашқы кадет сыныбы – Халық қаһарманы Ғазиз Байтасовтың есімімен аталған түлектер бітіріп шықты. Бүгінгі таңда мектепте «Айбын» оқу батальоны жұмыс істейді. Оның құрамында 4 взводқа біріктірілген 91 кадет бар:
1-взвод, 8 «А» (Әбілтану) – 23 кадет (қазақ тілі), бағыты – ҚР Қорғаныс министрлігі;
2-взвод, 8 «Б» (Бауыржантану) – 23 кадет (қазақ тілі), бағыты – ҚР Қорғаныс министрлігі;
3-взвод, 8 «В» (Жас құтқарушы) – 17 кадет (орыс тілі), бағыты – ҚР Төтенше жағдайлар министрлігі;
4-взвод, 6 «Г» (Жас сақшы) – 28 кадет (орыс тілі), бағыты – ҚР Ішкі істер министрлігі.
Жақын арада тағы бір 8-сыныпты кадет сыныбы ретінде ашу жоспарлануда. Ал келесі оқу жылында «Жас сарбаз» қозғалысына қосылуға бес сыныптың екеуі өтінім беріп отыр.
Өткен оқу жылында мектепте ҚР ҰҚК Шекара қызметі желісі бойынша бағытталған 7 «Г» – «Жас шекарашы» кадет сыныбы жұмыс істеген болатын. Биыл бұл сынып «Bilim Dos» орта мектебіне ауысты. Дегенмен дәстүр сақталып, оларға кадет формасын кию құқығы берілді. Мектеп директоры Лариса Максимова мен сынып кураторы Мақпал Данегулова кадеттердің ата-аналарына тұрақты қолдау мен көмек көрсеткені үшін алғыс білдіреді.
«Мен оқушылардың ата-аналарына, сондай-ақ Қордай аудандық білім бөлімінің басшысы Санат Әшірбековке кадет қозғалысын дамытуға көрсеткен қолдауы үшін ерекше алғыс айтқым келеді», – дейді Әнуар Мұхитұлы Қашқымбаев.
«Айбын» оқу батальонының басты мақсаты – жан-жақты дамыған, елжанды азаматтарды тәрбиелеу. Оның міндеттеріне Қазақстанның тарихы мен мәдениетін терең меңгерту, Отанды қорғауға дайындық қалыптастыру, төтенше жағдайларда іс-қимыл жасау дағдыларын дамыту, әскери іс пен техниканың негіздерін оқыту, әскери-спорттық ойындар мен жорықтар ұйымдастыру, ардагерлерге қамқорлық жасау және қайырымдылық жобаларға қатысу кіреді.
Республика күні – ел болашағы сенімді қолда екенін сезінудің айқын көрінісі. Әнуар Қашқымбаев бастаған ұстаздар мен кадет қозғалысына жанашыр азаматтардың еңбегі – Қазақстанның патриот жастарын тәрбиелеуге қосылған зор үлес. Мұнда «Отан» және «патриотизм» сөздері тек ұран емес, шынайы өмірлік құндылыққа айналған.
Мадина УЗБЕКОВА
