Қазіргі таңда цифрлық заманауи технологиялардың дамуы мемлекеттік қызметтерді халыққа қолжетімді әрі ыңғайлы түрде ұсынуға мүмкіндік беріп отыр. Осы бағытта сот жүйесінде де заманауи ақпараттық технологиялар кеңінен қолданылуда. Соның бірі – азаматтарға сот қызметтерін электрондық форматта алуға мүмкіндік беретін «Сот кабинеті» ақпараттық сервисі.
«Сот кабинеті» – сот органдарының қызметін жеңілдетуге, азаматтардың уақытын үнемдеуге және сот төрелігінің ашықтығын қамтамасыз етуге бағытталған электрондық қызмет көрсету жүйесі. Бұл сервис арқылы азаматтар мен заңды тұлғалар сотқа бармай-ақ, интернет желісі арқылы қажетті құжаттарын жолдап, сот істеріне қатысты ақпараттарды ала алады.
Аталған сервис пайдаланушыларға сотқа талап арыздар, өтініштер, шағымдар және басқа да процессуалдық құжаттарды электрондық түрде жіберуге мүмкіндік береді. Сонымен қатар сот істерінің қозғалысын бақылауға, сот актілерімен танысуға және өз ісіне қатысты мәліметтерді алуға болады. Бұл, әсіресе, жұмысбасты азаматтар үшін өте тиімді, өйткені сот ғимаратына бірнеше рет барудың қажеттілігін азайтады.
«Сот кабинетінің» басты артықшылықтарының бірі – қолжетімділік пен уақытты үнемдеу. Азаматтар интернетке қосылған компьютер немесе мобильді құрылғы арқылы қажетті қызметтерді пайдалана алады. Электрондық құжат айналымы қағаз құжаттардың көлемін азайтып, сот қызметкерлерінің жұмысын оңтайландыруға да ықпал етеді.
Сонымен қатар электрондық сервис сот жүйесінің ашықтығын арттырып, азаматтардың өз құқықтары мен заңды мүдделерін қорғау мүмкіндіктерін кеңейтеді. Сотқа жүгіну рәсімдерінің жеңілдеуі халықтың құқықтық сауаттылығын арттыруға және сот органдарына деген сенімін нығайтуға ықпал етеді.
«Сот кабинеті» – сот жүйесін цифрландырудың маңызды тетігі әрі азаматтарға қолайлы жағдай жасауға бағытталған заманауи сервис. Ол сот қызметтерінің қолжетімділігін арттырып, уақыт пен қаражатты үнемдеуге мүмкіндік береді. Мұндай цифрлық шешімдерді тиімді пайдалану – құқықтық мемлекетті дамыту мен халыққа сапалы мемлекеттік қызмет көрсетудің маңызды қадамы.
Ұ.ОМАРБАЕВА, Қордай аудандық сотының бас маманы
