Сәрсенбі күні аудан әкімдігінің кәсіпкерлік және өнеркәсіп бөлімі Қордай ауданы бойынша Мемлекеттік кірістер басқармасының қызметкерлерімен және Қордай аудандық ардагерлер кеңесінің төрағасы Б.Әлімбетпен бірге аудан орталығындағы сауда нысандарын аралап, азық-түлік бағасының негізсіз өсуіне жол бермеу мақсатында түсіндіру жұмыстарын жүргізді.
Рейд барысында дүкен сөрелеріндегі азық-түліктердің құны әлеуметтік маңызы бар тауарларға бекітілген баға көрсеткішімен салыстырылып, кәсіпкерлерге азық-түлік құнын қымбаттатпау және үстеме бағаны 15%-дан асырмау жөнінде ескерту жасалды. Сондай-ақ, мониторингтік топ өкілдері кассалық аппараттың бар-жоғын тексеріп, әр кәсіпкерде салық төлемі бойынша онлайн-деректер жіберіп отыратын аппараттың болуы міндетті екендігін айтты. Ауданда баға тұрақтылығын сақтау бойынша атқарылатын ауқымды жұмыстар легі мұнымен шектелмей, алдағы уақытта да өз жалғасын табатын болады.
