Қордай ауданының әкімі Бегзат Болатбеков аудан аумағында орналасқан «Шоқпар – Гагаринское» тау-кен байыту комбинатының жұмысымен танысты.
Жалпы құны 47 млрд теңгені құрайтын ауқымды жоба өткен жылы өз жұмысын бастаған болатын. Шоқпар және Гагарин тау бөктерінде төрт түрлі металл өндіріліп, өңделеді. Атап айтқанда, алтын, күміс, мырыш және қорғасын концентраттары өндіріледі. Өндіріс ошағы жылына 500 мың тоннаға дейін кен өндіруге қауқарлы. Комбинат құрылысы толықтай 2027 жылы аяқталады деп күтілуде.
Бегзат Сейсенқұлұлы комбинат өкілдерімен кездесіп, қазіргі жұмыс барысымен танысып, алдағы жоспарлары туралы сұрады. Сонымен қатар, мүмкіндігінше жергілікті тұрғындарды жұмыспен қамту мәселесіне ерекше назар аударды.
Айта кетерлігі, комбинат толық іске қосылған кезде 500-ге жуық адам тұрақты жұмыспен қамтылмақ.
Жалпы, жоба аумағы 1100 гектар жерді алып жатыр. Қазіргі таңда комбинат қажетті техникамен толықтай қамтамасыз етілген. Әкімшілік ғимараттар мен вахталық әдіспен жұмыс істейтін қызметкерлерге арналған орындар салынуда. Сонымен қатар, кен қазу және өңдеу жұмыстарына арналған арнайы техникаларға тапсырыс берілген. Олар жуық арада комбинатқа жеткізіледі.
Жалпы, ауданға тартылып жатқан инвестиция көлемін арттыруға елеулі үлес қосып отырған «Шоқпар – Гагаринское» тау-кен байыту комбинатының жұмысына аудан басшысы сәттілік тіледі.
