Елімізде, 29 қазан – күзет ұйымдары қызметкерлерінің күні. Бұл – ел тыныштығы мен қоғамдық қауіпсіздікті қамтамасыз ету жолында аянбай еңбек етіп жүрген азаматтардың кәсіби мерекесі. Бұл мерекенің мәні бір күндік құрметпен ғана шектелмейді. Оның астарында күнделікті көзге көріне бермейтін, жоғары жауапкершілікті, қырағылықты, темірдей тәртіп пен кәсіби біліктілікті талап ететін күрделі қызмет жатыр.
Күзет қызметінің тарихы тереңде. 1952 жылдан бастау алған бұл саланың негізгі мақсаты – мемлекет үшін маңызды нысандардың қауіпсіздігін қамтамасыз ету, қоғамдық тәртіпті сақтауға үлес қосу және құқық бұзушылықтардың алдын алу. Жылдар бойы қалыптасқан тәжірибе мен жинақталған кәсіби дағдының арқасында күзет қызметі құқық қорғау жүйесінің маңызды буындарының біріне айналды. Бүгінде бұл саланың қызметкерлері тек өздеріне бекітілген нысандардың амандығына жауап беріп қана қоймай, ішкі істер органдарының басқа бөлімшелерімен де тығыз байланыста жұмыс істейді. Қажет болған жағдайда қоғамдық қауіпсіздікті қамтамасыз етуге қатысып, құқық бұзушылықтардың жолын кесуге және қылмыстарды ашуға өз үлестерін қосуда.
Ауданымыздағы мемлекеттік мекемелер мен аса маңызды стратегиялық нысандардың қауіпсіздігін қамтамасыз ету міндеті Қазақстан Республикасы Ішкі істер министрлігі Жамбыл облысының мамандандырылған күзет қызметі басқармасы мемлекеттік мекемесінің 2-полиция батальоны Қордай ауданы взводына жүктелген. Бұл – әр қызметкерден сақтықты, шапшаңдықты, жауапкершілікті және өз ісіне деген адалдықты талап ететін жұмыс. Себебі күзеттегі әрбір нысанның қауіпсіздігіне немқұрайлы қарауға болмайды. Қызмет барысында жіберілген болмашы қателіктің өзі үлкен жауапкершілікке әкелуі мүмкін. Сондықтан мұнда әрбір қызметкер өз міндетін жетік біліп, кез келген жағдайға дайын болуы тиіс. Күзет қызметкерлерінің бір күндік жұмыс тәртібі сырт көзге қарапайым көрінуі мүмкін. Алайда оның әр кезеңі нақты жоспарға, белгіленген талаптарға және қатаң тәртіпке негізделген. Қызмет басталар алдында жеке құрам сапқа тұрып, саптық тексерістен өтеді. Қызметкерлердің әзірлігі, тәртіпке бағынуы мен міндеттерді орындауға дайындығы назарға алынады. Одан кейін нұсқаулық жүргізіліп, кезекшілік барысында ескерілетін маңызды жайттар түсіндіріледі. Әр бөлімше өзіне бекітілген нысанға аттанып, күзет міндетін атқаруға кіріседі. Осы сәттен бастап қызметкердің бар назары өзіне сеніп тапсырылған аумақтың қауіпсіздігіне аударылады. Бұл жөнінде 2-полиция батальоны командирінің орынбасары, полиция капитаны Берік Теміржанов өз ойымен бөлісті.
«Қазіргі таңда бізде 13 офицер, 84 адам сержанттық құрамда қызмет етеді. Әрқайсысының өз міндеті бар. Негізгі салмақ күзет қызметіндегі сақшыларға түседі ғой. Олардың негізгі міндеті – стратегиялық, аса маңызды, экономикалық нысандарды күзету. Күнделікті саптық тексеріс өтеді, міндетті түрде нұсқаулық жүргіземіз. Осыдан кейін әр бөлімше өзіне бекітілген мекемені күзетуге аттанады. Күзет қызметіндегі полицейлер бір тәулік істеп, үш тәулік демалады», — дейді полиция капитаны.
Шынында да, күзет қызметі – үздіксіз қырағылықты қажет ететін мамандық. Бір тәулік бойы кезекшілікте болу адамның физикалық төзімділігімен қатар, психологиялық дайындығын да сынайды. Қызметкер қандай жағдайда да сабыр сақтап, айналасында болып жатқан өзгерістерді жіті бақылап, күмәнді әрекеттерге бейжай қарамауы керек. Әрбір жағдайды дұрыс бағалап, белгіленген тәртіпке сай әрекет ету – кәсіби шеберліктің басты көрсеткіші. Осындай талаптарды күн сайын орындау арқылы күзетшілер өздеріне жүктелген міндеттің маңызын терең сезінеді. Күзет қызметінің жауапкершілігі тек нысанның кіреберісінде тұрумен немесе белгіленген аумақты бақылаумен шектелмейді. Қызметкерлер қоғамдық қауіпсіздікті сақтауға, азаматтардың алаңсыз өмір сүруіне жағдай жасауға да атсалысады. Олардың қырағылығының арқасында көптеген қауіптің алдын алуға мүмкіндік туады. Кейде қызметтің нәтижесі көзге бірден көрінбеуі мүмкін. Дегенмен қауіптің орын алмауы, тәртіптің бұзылмауы және нысанның қалыпты жұмыс істеуі – күзетшілер еңбегінің маңызды нәтижесі. Сондықтан бұл мамандықта күнделікті жауапкершілік пен қызметке адалдықтың орны ерекше. Берік Теміржановтың өзі де осы саланың қыр-сырын жақсы меңгерген тәжірибелі мамандардың бірі. Ол еңбек жолын осыдан 18 жыл бұрын аудандық полиция ротасында бастаған. Содан бері талай қызметтік кезеңнен өтіп, мол тәжірибе жинақтады. Жылдар бойы қалыптасқан кәсіби дағдысы мен қызмет барысында түйген тәжірибесі бүгінде өз жұмысына сенімділікпен қарауына мүмкіндік береді. Қызметтің қиындығын да, жауапкершілігін де жақсы білетін ол жас полицейлерге бағыт-бағдар беріп, олардың кәсіби тұрғыда қалыптасуына көңіл бөледі. Жас маманның бойында тәртіп пен жауапкершілік қалыптастыру, қызметтік міндеттерді дұрыс түсіндіру, қиын сәттерде сабыр сақтауға үйрету – тәжірибелі қызметкерлердің маңызды міндеттерінің бірі. Өйткені құқық қорғау саласында кәсіби білімнің өзі жеткіліксіз. Оны күнделікті тәжірибемен ұштастырып, адамгершілік қасиеттермен толықтыра білу қажет. Әріптестер арасындағы өзара сенім, бір-біріне қолдау көрсету және ортақ міндет жолында жұмыла білу де қызметтің сапасына тікелей әсер етеді. Полиция капитанының пікірінше, нағыз полицей болу үшін бойдағы қайсарлық пен төзімділікті үнемі шыңдап, ең алдымен, еліңе адал қызмет ету керек. Антқа беріктік, темірдей тәртіп, жауапкершілік пен кәсіби міндетке деген құрмет – құқық қорғау саласында еңбек ететін әрбір азаматтың бойынан табылуы тиіс қасиеттер. Қызмет барысында кездесетін түрлі жағдайларға дайын болу үшін қызметкер өзін үнемі жетілдіріп, тәжірибесін арттырып отыруы қажет. Ал азаматтардың сенімін ақтау үшін заң талаптарын сақтап, әрбір іске әділдік пен байыптылық тұрғысынан қарау маңызды. Күзет қызметінде еңбек ететін азаматтардың жұмысы көп жағдайда көпшіліктің назарынан тыс қалып жатады. Олар мереке күндері де, демалыс уақытында да кезекшілік атқарып, өздеріне сеніп тапсырылған нысандардың қауіпсіздігін қамтамасыз етеді. Қызметтің үздіксіздігі олардың жеке уақыты мен күнделікті тіршілігіне де белгілі бір талап қояды. Соған қарамастан, әр қызметкер өз міндетін абыроймен атқаруға ұмтылады. Өйткені олардың жұмысының артында мемлекет мүлкінің сақталуы, маңызды нысандардың тұрақты жұмыс істеуі және қоғамның қауіпсіздігі секілді үлкен жауапкершілік тұр.
Ел тыныштығы – әр азамат үшін қымбат ұғым. Ал сол тыныштықты сақтауға өз үлесін қосып жүрген жандардың еңбегі әрдайым құрметке лайық. 29 қазан – күзет ұйымдары қызметкерлерінің күні қарсаңында осы сала мамандарына алғыс білдіріп, жауапты қызметтеріне табыс, отбасыларына амандық тілейміз. Антқа адалдық пен елге қызмет етуді өмірлік ұстанымына айналдырған тәртіп сақшыларының еңбегі әрдайым жемісті болсын!
