Отар ауылдық мәдениет үйінде дәстүрлі түрде ұйымдастырылатын мерекелік шаралар қатарын биыл Теміржолшылар күніне арналған кеш жалғастырды. «Ерен еңбек еленген күн» атауымен өткен бұл концерттік бағдарлама теміржол саласында тынымсыз еңбек етіп жүрген жандарға деген ел құрметінің белгісіндей болды.
Аталған кешке ауыл тұрғындары, сала ардагерлері мен қазіргі уақытта теміржолда еңбек етіп жүрген қызметкерлер қатысты. Теміржол — мемлекеттің күретамыры, ел экономикасының тірегі. Ал осы саланың ардагерлері мен майталман мамандары – нағыз еңбек адамдарының үлгісі.
Шараның салтанатты ашылуында ауылдық округтің әкімдігі атынан құттықтау сөз сөйленіп, теміржол саласының ел дамуына қосқан үлесі атап өтілді. Сондай-ақ ауылдың бірқатар теміржол қызметкерлері мен ардагерлері арнайы алғыс хаттармен және естелік сыйлықтармен марапатталды. Марапат иелерінің қатарында ондаған жыл еңбек еткен теміржолшылармен бірге жас мамандар да болды. Бұл — ұрпақтар сабақтастығы мен еңбек дәстүрінің жалғасып жатқанын білдіреді.
Концерттік бағдарлама барысында мәдениет үйінің өнерпаздары мен шығармашылық үйірмелердің қатысушылары көрермендерге көтеріңкі көңіл-күй сыйлады. Ән мен күйден, мың бұралған биден құралған қойылымдар кештің шырайын аша түсті. Әсіресе теміржолшылардың құрметіне арналған патриоттық әндер мен поэзиялық композициялар көпшіліктің жүрегінен орын тапты.
Бұл кештің негізгі мақсаты — тек көңіл көтеру емес, теміржол саласында адал еңбек етіп жүрген азаматтарды ұлықтау, олардың еңбегін бағалау арқылы жастар арасында еңбекке деген құрмет сезімін қалыптастыру. Сонымен қатар ауыл тұрғындары арасындағы ынтымақтастық пен бірлікті арттыру, мәдени шаралар арқылы қоғамның рухани әлеуетін көтеру де көзделді.
Теміржолшылар — әркез уақытпен санаспай, ел мен жерді байланыстырып тұрған сала өкілдері. Олардың еңбегі күн сайын көзге көрінбесе де, қоғам тіршілігі үшін аса маңызды. Отар ауылы осындай еңбек иелеріне құрмет көрсетуді өзінің парызы санайды.
