Қордай ауданында спорттың басқа да түрлерімен қатар, теннис спорты да белсенді дамып келеді. Әсіресе балаларды осы спорт түріне тартуға және олардың жаттығуы мен жарысқа қатысуына қажетті жағдай жасауға ерекше көңіл бөлінуде.
№18 балалар-жасөспірімдер спорт мектебінің базасында жас теннисшілер үшін тұрақты түрде жаттығулар өткізіледі. Кезекті спорттық шаралардың бірі – Қордай ауылындағы «Жасыл» саябақта арнайы жабдықталған теннис кортында 7 жасқа дейінгі балалар арасында өткен «Red Ball» ашық турнирі.
Жарысқа Қордай ауданының, Алматы қаласының және Бішкек қаласының жас спортшылары қатысты. Қатысушылардың жасы өте кішкентай болғанына қарамастан, олар нағыз спорттық мінездерін, үлкен ынта-жігері мен ойынға деген қызығушылығын көрсетті.
Ауданда балалар теннисін дамытуға ерекше назар аударылуда. Қордай ауданында «10 жасқа дейінгі теннис» бағытын дамыту бойынша үйлестіруші – Марина Мартышева. Жас спортшылармен жүргізілетін жүйелі жұмыстардың арқасында балалардың теннистегі алғашқы қадамдарын жасауына, жарыс тәжірибесін жинақтауына және әрі қарай спорттық шеберлігін шыңдауына қолайлы жағдай жасалуда.
«Жас болса да, барлық балалар – үлкен жетістікке жетті, жарайсыңдар! Көпшілігі үшін бұл алғашқы жарыс тәжірибесі болды. Соған қарамастан, барлығы өздерін жақсы қырынан көрсете білді. Біздің тәрбиеленушіміз Ербол Алдияр жүлделі 3-орынға ие болды. Оны жеңісімен құттықтаймыз!» – деп атап өтті №18 балалар-жасөспірімдер спорт мектебінің өкілі.
