Қордайда «Саналы түрде отбасын құру» шарасы аясында салтанатты түрде неке қию рәсімі өтті.
Қордай ауылының көрікті бұрыштарының бірінде орналасқан жеке саябақта «Аяла» отбасын қолдау орталығының мамандары мен азаматтық хал актілерін тіркеу (АХАТ) бөлімінің қызметкерлері бірлесіп, «Саналы түрде отбасын құру» тақырыбында мағыналы кездесу өткізді.
Бұл кештің ерекше маңызды сәті — жас жубайлардың некесін салтанатты түрде тіркеу рәсімі болды. Мерекелік әрі салтанатты жағдайда жастар бір-біріне адал болуға уәде беріп, ресми түрде ерлі-зайыпты атанды және өздерінің алғашқы отбасылық құжаты — неке қию туралы куәлікті қолдарына алды.
Осы бір тебіреністі сәт шараның басты оқиғасына айналып, отбасын құру — жай ғана формалды процедура емес, үлкен жауапкершілікті, өзара құрмет пен теңдессіз саналылықты талап ететін өмірлік маңызды қадам екенін айқын көрсетті. Ерлі-зайыпты болуды саналы түрде таңдау — бұл тек бір-бірің үшін емес, шаңырақтың жарқын болашағы үшін де жауапкершілік арқалау деген сөз.
Кездесу барысында отбасын құруға дайындалып жүрген жастар үшін ең өзекті мәселелер қозғалды. Қатысушыларға отбасылық құндылықтар, ерлі-зайыптылар арасындағы өзара түсіністік пен құрмет, жауапкершілік және өмірлік қиындықтарды бірге еңсеруге дайын болудың маңызы кеңінен түсіндірілді.
Мамандар берік отбасының іргетасы күн сайын қаланатынын атап өтті. Сенім, құрмет, қолдау мен бір-бірін тыңдай білу бар жерде махаббат та баянды болады. Отбасылық қарым-қатынас тек сезімді гана емес, сонымен бірге бір-біріне жол беруді, компромисс табуды және маңызды шешімдерді бірге қабылдауды талап етеді.
Шараның ең әсерлі де тебіреністі сәті — жастарға бата беру рәсімі болды. Аудандық Ардагерлер кеңесінің төрағасы Біржан Әлімбет жас жубайларға жүрекжарды ақ тілегін арнап, жаңа шаңыраққа өзара түсіністік, береке-бірлік, мол бақыт пен уақытқа толы ұзақ ғұмыр тіледі.
Табиғат аясындағы салтанатты тіркеу рәсімі жай ғана әдемі оқиға болып қоймай, жаңа отбасылық өмірдің символына айналды. Қонақтардың алдында жастар бірге қадам басар болашақтарына алғашқы ресми қадамдарын жасап, отбасылық куәлікпен бірге аға буынның ақ батасын алды.
Бүгінгі таңда отбасы институтын нығайтудың орны бөлек. Адам баласы махаббатты, құрметті, қамқорлық пен жауапкершілікті ең алдымен отбасында үйренеді. Болашақ ұрпақтың өмірлік құндылықтары мен адами қасиеттері де осы шаңырақта қалыптасады.
Сол себепті де отбасылық құндылықтарға арналған мұндай шаралардың танымдық маңызы зор. Олар отбасылық өмір туралы ашық сұхбаттасуға мүмкіндік беріп, жастардың отау құруға саналы түрде келуіне көмектеседі, сондай-ақ өзара құрмет пен қолдаудың қаншалықты маңызды екенін тағы бір мәрте еске салады.
Жас жұбайлар үшін бұл күн — олардың отбасылық шежіресіндегі ресми түрде отау тігіп, алғашқы ортақ құжаттарын алған ерекше де ұмытылмас парақ болып қала береді.
Жаңадан шаңырақ көтерген жастардың өмір жолы махаббатқа, өзара құрмет пен бақытқа толы болсын! Өйткені берік отбасы — қол ұстасып бірге жүруге бел буған екі адамның саналы таңдауынан бастау алады.
