Қазақстан Республикасының Президенті Қасым-Жомарт Тоқаевтың 2026 жылды «Цифрландыру және жасанды интеллект жылы» деп жариялауы – еліміздің технологиялық даму жолындағы маңызды қадамдардың бірі. Бұл бастама жаңа технологияларды өмірдің барлық саласына кеңінен енгізуге, цифрлық трансформацияны жеделдетуге, жасанды интеллект мүмкіндіктерін тиімді пайдалануға және бәсекеге қабілетті мамандар даярлауға бағытталған.
Бүгінгі таңда жаһандық өзгерістерге бейімделіп, заманауи білім мен озық технологияларды меңгеру – уақыт талабы. Әсіресе, еңбек нарығында сұранысқа ие, кәсіби білімі терең, жаңа технологияларды еркін меңгерген мамандарды даярлау ісіне айрықша мән берілуде. Осы бағытта білім беру ұйымдарының материалдық-техникалық базасын нығайтып, оқу үдерісіне инновациялық шешімдерді енгізу маңызды рөл атқарады. Мемлекет басшысы айқындаған басымдықтарды негізге ала отырып, өңірлердегі білім беру мекемелері де заман талабына сай жаңғыруға бет бұруда. Соның жарқын мысалдарының бірі – Ноғайбай ауылында орналасқан Әбілқайыр Айжарықов жетекшілік ететін Қордай ауылшаруашылық колледжінде қолға алынған игі бастамалар. Колледж ұжымы жас ұрпаққа сапалы білім берумен қатар, олардың кәсіби дағдыларын жетілдіруге, заманауи технологиялармен жұмыс істеу қабілетін қалыптастыруға және болашақ мамандардың еңбек нарығында бәсекеге қабілетті болуына ерекше көңіл бөліп келеді. Осы мақсатта 2026/2027 жаңа оқу жылында колледжде «Жаңартылған энергетика» мамандығына арналған арнайы кабинетті ашу жоспарланып отыр. Жаңа кабинет студенттердің теориялық білімін тәжірибемен ұштастырып, энергетика саласындағы заманауи технологияларды тереңірек меңгеруіне мүмкіндік береді. Бүгінде энергетика саласы әлемдік экономиканың маңызды бағыттарының біріне айналды. Сондықтан осы салада білім алатын студенттердің тек теориялық біліммен шектелмей, нақты құрылғылармен жұмыс істеп, заманауи технологиялардың жұмыс істеу қағидаттарын тәжірибе жүзінде түсінуі аса маңызды. Осы тұрғыдан алғанда, Қордай ауылшаруашылық колледжінде ашылатын жаңа мамандандырылған кабинеттің маңызы зор. Кабинеттің басты ерекшеліктерінің бірі – онда заманауи технологиялардың мүмкіндіктерін танытатын «ақылды үй» жүйесінің жасақталуы. Бұл жоба студенттерге цифрлық технологиялардың күнделікті тұрмыста қалай қолданылатынын көзбен көріп қана қоймай, оның жұмыс істеу тетіктерін тәжірибе жүзінде зерделеуге жол ашады. «Ақылды үй» – тұрмыстық техника, жарықтандыру жүйелері, электрондық құрылғылар мен басқа да инженерлік жабдықтарды бір ортаға біріктіріп, оларды автоматты түрде немесе қашықтан басқаруға мүмкіндік беретін заманауи технологиялық жүйе. Мұндай жүйелердің басты артықшылығы – адамға қолайлылық жасаумен қатар, энергияны тиімді пайдалануға, уақытты үнемдеуге және тұрмыстық қауіпсіздікті арттыруға мүмкіндік беруінде. Мәселен, жарықтандыруды автоматты түрде реттеу, электр құрылғыларын қашықтан қосып-өшіру, бөлме ішіндегі температураны бақылау, энергия тұтынуды қадағалау сияқты функциялар «ақылды үй» технологиясының мүмкіндіктерін көрсетеді. Осындай шешімдер арқылы электр энергиясын орынсыз жұмсауды азайтып, ресурстарды ұтымды пайдалану мәдениетін қалыптастыруға болады. Жаңа кабинетте жасақталған «ақылды үй» жүйесі студенттердің цифрлық сауаттылығын арттыруға, электрондық құрылғылардың өзара байланысын түсінуге, автоматтандырылған басқару жүйелерінің жұмысымен танысуға және инженерлік ойлау қабілетін дамытуға ықпал етеді. Цифрландыру мен жасанды интеллект дәуірінде техникалық және кәсіптік білім беру жүйесінің алдында тұрған маңызды міндеттердің бірі – студенттерді тек дайын білімді қабылдаушы емес, оны тәжірибеде қолдана алатын, жаңа технологияларды меңгеруге қабілетті және өзгерістерге бейім маман ретінде қалыптастыру. Колледжде жүзеге асырылып жатқан бұл игі істің тағы бір ерекшелігі – оның әлеуметтік серіктестік негізінде қолға алынуы. Жаңа кабинетті жасақтауға «ENERGO GROUP» жеке кәсіпкерлігі қолдау көрсетіп отыр. Білім беру мекемесі мен кәсіпкерлік субъектілерінің өзара ынтымақтастығы – кәсіби мамандар даярлау сапасын арттырудың тиімді жолдарының бірі. Мұндай әріптестік білім беру ұйымдарының материалдық-техникалық мүмкіндіктерін кеңейтіп қана қоймай, студенттердің болашақ мамандығына қажетті практикалық дағдыларды меңгеруіне де жағдай жасайды.
Қордай ауылшаруашылық колледжінде қолға алынған жаңашылдықтар тек энергетика саласымен шектелмейді. Колледжде басқа да мамандықтар бойынша білім алушылардың тәжірибелік даярлығын жетілдіруге бағытталған жұмыстар жүргізілуде. Соның ішінде ветеринария мамандығының зертханалық кабинетін қажетті құрал-жабдықтармен қамтуға Жамбыл облыстық мәслихатының депутаты, «Eco – Chiken» жеке шаруашылық серіктестігінің басшысы Талғат Сәрсенбаев та өз үлесін қосты. Бұл қолдау ветеринария мамандығы бойынша білім алып жатқан студенттердің зертханалық сабақтарды сапалы өткізуіне және болашақ кәсібіне қажетті тәжірибелік дағдыларды қалыптастыруына бағытталған маңызды бастама. Ветеринария – ауыл шаруашылығының тұрақты дамуына тікелей ықпал ететін, қоғам үшін стратегиялық маңызы бар мамандықтардың бірі. Мал шаруашылығының өнімділігін арттыру, жануарлардың денсаулығын сақтау, жұқпалы аурулардың алдын алу, ветеринариялық-санитариялық талаптарды орындау және қауіпсіз азық-түлік өндіру ісінде ветеринар мамандардың орны ерекше. Әсіресе, ауыл шаруашылығы жақсы дамыған Қордай ауданы үшін бұл мамандықтың маңызы зор. Өңірдегі мал шаруашылығы мен аграрлық өндірістің дамуы жануарлардың саулығын қамтамасыз ете алатын, зертханалық жұмыстарды меңгерген, заманауи әдістерді қолдануға дайын білікті кадрларға деген қажеттілікті арттыра түседі. Осыған байланысты ветеринария мамандығының зертханалық кабинетін жабдықтау – студенттердің кәсіби даярлығын жетілдіруге бағытталған маңызды іс. Зертханалық сабақтар барысында білім алушылар теориялық білімдерін нақты тапсырмалар арқылы бекітіп, зерттеу жүргізудің негізгі әдістерімен танысады. Зертханалық құрал-жабдықтармен жұмыс істеу олардың ұқыптылық, жауапкершілік, дәлдік және кәсіби тәртіп сияқты қасиеттерін қалыптастыруға ықпал етеді. Сонымен бірге зертханалық орта студенттердің ғылыми ізденіске деген қызығушылығын оятып, жануарлар денсаулығын сақтау мен ветеринариялық қауіпсіздікті қамтамасыз ету мәселелерін тереңірек түсінуіне мүмкіндік береді.
Бүгінгі таңда техникалық және кәсіптік білім беру ұйымдарына қойылатын талаптар жылдан-жылға артып келеді. Жұмыс берушілерге теориялық білімі мол ғана емес, өндірістік ортаға тез бейімделетін, заманауи құрал-жабдықтарды пайдалана алатын, жауапкершілігі жоғары мамандар қажет. Сондықтан колледждердегі оқу кабинеттері мен зертханаларды жаңғырту, практикалық сабақтардың мазмұнын жетілдіру және әлеуметтік серіктестермен байланыс орнату білім сапасын арттырудың негізгі тетіктерінің бірі болып саналады. Қордай ауылшаруашылық колледжінде жүзеге асырылып жатқан жұмыстар осы қажеттіліктерге жауап беруге бағытталған. Мұндай бастамалардың нәтижесі бір күнде көрінбеуі мүмкін. Алайда білім беру саласына жасалған әрбір инвестицияның жемісі уақыт өте келе байқалады. Бүгін заманауи кабинетте білім алып, жаңа технологияларды меңгерген студент ертең өз саласының білікті маманына айналып, өңірдің әлеуметтік-экономикалық дамуына үлес қоса алады. Ал тәжірибелік сабақтарға қажетті жағдай жасалған ортада оқыған жас маман кәсіби міндеттерін орындауға анағұрлым дайын болып қалыптасады. Осы тұрғыдан алғанда, оқу кабинеттерін жаңарту мен зертханаларды жабдықтау – тек материалдық базаны жақсарту емес, ең алдымен, жастардың болашағына жасалған қамқорлық.
Өйткені елдің ертеңі – сапалы білім алған, заманауи технологияларды меңгерген және өз кәсібіне адал жас мамандардың қолында. Ал сол мамандарды даярлауға бүгін жасалған жағдай, көрсетілген қолдау мен атқарылған нақты іс – болашаққа бағытталған ең маңызды инвестициялардың бірі.
Әділет ҚҰТТЫБАЙ
