Мал шаруашылығы қызметкерлері күні — еліміздегі ауыл шаруашылығы секторындағы маңызды мерекелердің бірі. Маусым айының екінші жексенбісінде атап өтілетін бұл күн, мал шаруашылығы мамандарының еңбегіне құрмет көрсету мақсатында ұйымдастырылады.
Қордай ауданының мал шаруашылығы мамандары осы жыл сайынғы мерекені өндіріс көлемінің тұрақты өсуімен, ауыл шаруашылығы жануарлары санының артуымен және саланы ауқымды жаңғыртудағы табыстарымен қарсы алуда.
Мал шаруашылығы қызметкерлерінің маңдай тері, табанды еңбегі мен кәсіби шеберлігі арқасында еліміздің аграрлық секторында негізгі өнім түрлерін өндіру көлемі жылдан-жылға артып келеді. Бұл салада жұмыс істейтін мамандар жан-жақты жаңалықтар енгізіп, тиімді технологиялар мен әдістерді пайдаланып, мал шаруашылығын дамытуда үлкен рөл атқаруда.
Осы орайда, Қақпатас ауылының жас кәсіпкері Ерсұлтан Нұрлыбаймен тілдесудің сәті түсті. Ерсұлтан — ауыл тұрғындарының мақтанышы, жас шаруагер қожалығының негізін 2020 жылы қалаған. Алғашқыда 70 бас асыл тұқымды қоймен бастаған шаруа қожалығы, бүгінгі таңға дейін өзінің өсімін көріп, асыл тұқымды «Арашан» қойларының саны 400-ге жеткен. Бұл Ерсұлтанның еңбекқорлығы мен табандылығының нәтижесі.
«Мен мал шаруашылығына бала кезімнен қызықтым. Ата-анам да ауыл шаруашылығымен айналысқан, сондықтан мен үшін бұл салада еңбек ету — туған жеріме, ата-бабамның дәстүріне адалдық болып табылады. 2020 жылы өз кәсібімді қолға алдым. Алғашқыда 70 асыл тұқымды қоймен бастадық, енді олардың саны 400 басқа жетті. Біздің бағыт — тек саны емес, сапасы да. Біз асыл тұқымды «Арашан» қойларының өсімін қамтамасыз етуге тырысудамыз», — дейді Ерсұлтан.
Ерсұлтанның айтуынша, қой шаруашылығын дамытуда бірнеше негізгі мәселелерді шешуге көңіл бөлінеді. Оның ішінде, жем-шөп мәселесін өз егістік алқабынан қамтамасыз ету аса маңызды. Бұл шаруашылық шығындарын азайтып, өнімнің өзіндік құнын төмендетуге көмектеседі. Ерсұлтан мал шаруашылығы саласындағы жаңашылдықтарды енгізуге, заманауи технологияларды пайдалануға және малдың асыл тұқымын сақтауға ерекше назар аударады.
Жас кәсіпкердің шаруашылығында өндіріс процестері барлық кезеңдерде тиімді ұйымдастырылған. Оған тәжірибе, білім және ауылдағы қолдау көмектесуде.
Мал шаруашылығында өнімнің сапасы мен көлемін арттыру, нарық талаптарына жауап беру, тұрақты даму бағытында жұмыс істеу — кәсіп иесі жоспарының маңызды бөлігі. Жас кәсіпкер, тың қабілеттерін пайдалана отырып, ауыл шаруашылығын өркендетуге өз үлесін қосып, келешекте одан әрі өсімді қамтамасыз ету үшін жұмыс істеп жатыр.
Мал шаруашылығы қызметкерлерінің елеулі еңбегі мен Қазақстандағы ауыл шаруашылығының дамуына қосқан үлесі мемлекеттік деңгейде бағаланып, жыл сайын тойланатын мерекемен қатар, оны дамытуда іс-әрекеттері мен жетістіктері елімізде зор маңызға ие. Ерсұлтан Нұрлыбай мен оған ұқсас жас кәсіпкерлердің үлесі, болашақта еліміздің аграрлық секторына жаңа серпін беруімен маңызды болып табылады.
Әділет ҚҰТТЫБАЙ
